Hver er verðmiðinn?

Sumir þingmenn hafa farið mikinn síðustu daga, vegna áætlana um þyngri aðgerðir vegna covid veirunnar. Þar fara fram þingmenn bæði stjórnar og stjórnarandstöðu. Einn þeirra hótar að Alþingi takið málið til endurskoðunar meðan annar segir að grafalvarlegt sé að læsa frískt fólk inni. Dramatísk ummæli sem dæma sig sjálf.

 

Auðvitað er enginn frískur einstaklingur læstur inni, einungis þeir sem þegar hafa smitast og þeir sem grunur er á að hafi smitast og bíða eftir niðurstöðum mælinga. Samkvæmt þessi telur viðkomandi þingmaður að sá sem mælist smitaður geti jafnframt verið frískur. Eitt er þó víst að ekki er víst að sá sem þessi "fríski" einstaklingur smitar verði jafn heppinn og sá "fríski". Um þetta snýst málið. Ef hægt væri að tryggja að enginn sem smitast veikist, væri málið einfalt. En svo er ekki, sumir veikjast illa og sumir þurfa að gjalda með lífi sínu. Það hefði verið málinu hæfara ef viðkomandi þingmaður hefði sagt að það væri graf alvarlegt að láta smitaða ganga lausa í þjóðfélaginu.

Ósátti stjórnarþingmaðurinn, sem ætlar að láta Alþingi taka völdin í þessu máli, kallar eftir fyrirsjáanleika. Maður spyr sig hvernig svona menn komast yfirleitt í þá stöðu að vera í framboði til Alþingis, hvað þá að ná þangað inn. Veit maðurinn ekki að það er verið að berjast við vírus sem herjar á heimsbyggðina? Hvernig ætlar hann að fá fyrirsjáanleika í þeirri baráttu? Þetta er svo vitlaust að engu tali tekur!

Eftir nærri tveggja ára baráttu við þennan illvíga sjúkdóm ætti fólki að vera ljóst að veiran fer hvorki eftir valdskipunum né í manngreiningarálit. Meðan hún geisar hefur hún völdin. Svo einfalt er það. Aðgerðir stjórnvalda eru til þess eins að verja borgarana. Sóttvarnarlæknir, sem hefur jú menntun á þessu sviði, kemur með tillögur til stjórnvalda, eftir stöðu veirunnar og byggðar á fræðunum. Stjórnvöld taka síðan ákvarðanir og bera á þeim ábyrgð. Við þá ákvarðanatöku á líf borgarana að skipta mestu, síðan hvernig heilbrigðiskerfið er í stakk búið og að lokum má einnig horfa til hagfræðilegra þátta. Þeir eru þó nánast aukaatriði. Hér á landi hefur tekist einstaklega vel að feta þann veg, einkum vegna þess að stjórnvöld hlusta á sér hæfara fólk á sviði sóttvarna. Vonandi mun það verða svo þar til sigur hefur unnist á veirunni. Þar til sigur hefur unnist má búast við að hér verði tilslakanir og hertar aðgerðir á víxl, eftir því hvernig veiran hagar sér.

Það að setja hagfræðilegar staðreyndir neðar lýðheilsu virðist fara fyrir brjóstið á sumum. Það er sárt að horfa til þess að til séu þannig þenkjandi fólk. Ef það er svo að þetta fólk telji mannslát vera ásættanlega fórn til að halda hagkerfinu sem bestu, þarf það að tilgreina hversu margir þurfi að láta lífið áður en farið er í hertari aðgerðir. Það þarf þá að hafa verðmiða á mannslífin!

 

Nýju aðgerðirnar taka gildi á Þorláksmessu

Athugasemdir

[Tómas Ibsen Halldórsson, 21.12.2021 kl. 16:32]

Þetta kóvid ævintýri allt saman er orðið efni í dramatískan grínþátt, bíómynd, sem Jerry Lewis heitinn o.fl. grínistar hefðu sómað sig vel í.

[Bjarni G. Bjarnason (IP-tala skráð) 21.12.2021 kl. 17:05]

Fullkomnlega sammála pistli. 

Furðulegt hvað "hæstvirtum"? þingmönnum sumum gengur illa að sjá aðalatriði málsins. 

Nú er talið að næstum eitt prósent smitaðra af nýjustu útgáfu veirunnar muni þurfa fullkomna læknisaðstoð og teppa þar með bráðaþjónustu Landspítalans. Hærra hlutfall hjá Delta afbrigðinu sem nú er aðalega að grassera. 

Án hertari aðgerða stefnir hratt í að spítalinn yfirfyllist og farið verði að víkja frá fólki með t.d. krabbamein og hjartasjúkdóma.

Fólki sem verður að fá afgreiðslu STRAX!

Þetta er stóri vandinn furðulegt að menn eins og t.d. Vilhjálmur Árnason sbr. viðhengda frétt skuli neita að horfast í augu við raunveruleikann. 

Hvernig eru þeir þá í öðrum málum úr því að þeir flaska svona ferlega á hinu augljósa?

Sjálfstæðismenn margir eru að verða álíka og gömlu kommarnir að láta pólitískar trúarkreddur bera skynsemina ofurliði. Tja nema að þeir séu bara svona vitlausir? 

Skynsemishyggjan sem Sigmundur Davíð boðaði í pólitík, fokinn út um gluggann. 

https://www.ruv.is/frett/2021/12/21/thingmenn-muni-gera-athugasemdir-vid-hertar-adgerdir

[Daníel Sigurðsson, 21.12.2021 kl. 21:14]

Smá ábending:

Gömul venja að ávarpa þingmenn háttvirta en ráðherra hæstvirta.

[Gunnar Heiðarsson, 21.12.2021 kl. 21:21]

Það má vissulega segja að sumir þingmenn séu nokkuð utan raunveruleikans, Tómas, jafnvel kómískir.

[Gunnar Heiðarsson, 21.12.2021 kl. 21:21]

Mikið rétt Bjarni

[Gunnar Heiðarsson, 21.12.2021 kl. 21:24]

Ég er nú varla í stuði til að ávarpa þingmenn sem háttvirta eða ráðherra sem hæstvirta, Daníel. Þeir hafa ekki hagað sér þannig. Enda eru þessi ávörp fyrst og fremst notuð í sal Alþingis, líta sig þar stærri menn en þeir eru!

[Daníel Sigurðsson, 21.12.2021 kl. 21:55]

Mikið rétt Gunnar, en þetta var nú bara smá ábending til Bjarna, hér að framan, sem nefndi þingmenn hæstvirta en ekki háttvirta. 

[Bjarni G. Bjarnason (IP-tala skráð) 21.12.2021 kl. 23:10]

Þakka ábendinguna, rétt skal vera rétt!

[Þröstur R., 22.12.2021 kl. 13:53]

Ætli þessir ágætu þingmenn hafi fengið jákvætt úr PCR skimun á 40 cyc?

Þetta eru ekki nýjar upplýsingar en CDC hefur óskað eftir því við FDA að það afturkalli það neyðarleyfi sem það fékk í Feb 2020 um að nota Real-Time RT-PCR Diagnostic Panel til að greina SARS COV-2 frá og með 31. Des 2021. 

Ástæðan ku vera sú að prófið gefum mikið faulse positve og gerir ekki greinarmun á SARS COV-2 og haust flensu.

Eins og við vitum þá hefur flensan gufað upp og er enn týnd.

WHO setti inn tilkynningu 20. Jan 2021 um breytta verkferla fyrir PCR prófin og ættu þau ekki að vera á hærri snúninga en 28 annars margfaldast líkur á Faulse positive niðurstöðum. Einnig sagði WHO í sömu grein að þau sem hafa fengið jákvæða niðurstöðu ættu að taka prófið aftur og lægri snúning en við vitum öll að það er ekki gerlegt.

EKki að það sé hægt að trúa einu eða neinu frá sjálfstæðari stofnun sem fær einn stærsta fjárhagslega styrkinn frá þeim sömu sem eru að selja bóluefnin en þetta er það sem við höfum.

Það verður einkar áhugarvert að sjá hvað verður notað í staðin en ég hef ekki séð eða tekið eftir einhverri umræðu um breytingar á PCR prófum hérlendis. Spurning hvort það komi einhver tilkynning frá EU þess eðlis.

https://www.cdc.gov/csels/dls/locs/2021/07-21-2021-lab-alert-Changes_CDC_RT-PCR_SARS-CoV-2_Testing_1.html