Enn einn brandarinn?

Eða hafa fulltrúar stjórnkerfis Reykjavíkurborgar ekki getu eða nennu til að fara á klósettið og pissa bara í skó sinn?

Það verður að segjast eins og er að eftir að grínborgarstjórinn tók við völdum, hefur grínið dafnað í stjórnkerfi Reykjavíkur. Enginn embættismaður virðist þora að benda á staðreyndir, heldur er bara hlegið með. Kjarkleysi embættismanna ýtir undir fáráðnleikann.

Það er vissulega þekkt aðferð að rykbinda malarvegi með salti. Þá er gjarnan keyrt leir ofaná malarvegina, eða hrært duglega í drullu þeirra og salt síðan látið binda þessa drullu saman. Þegar vel tekst til hefur þetta skilað góðum árangri en oftar er þó árangurinn frekar takmarkaður.

Að ætla að binda þunnt lag af ryki sem liggur á malbikuðu undirlagi, með salti, er eins vitlaust og frekast getur orðið. Það væri gaman að vita hvaða "snillingur" lagði þetta til. Vissulega getur verið að rykið bindist saman, en jafn skjótt og það þornar og fyrsti bíll ekur yfir það, mun það molna niður í sitt fyrra horf. Eina sem breytist er að nú hefur salti verið bætt við rykið og magn þess því aukist.

Þá má ekki gleyma þeirri staðreynd að megnið af átu malbiksins má rekja til söltunar gatna. Saltið deigir tjöruna og auðveldar átu malbiksins. Því mun þessi saltpækill enn auka vanda við svifmengun.

Eina lausn þessa vanda er að þrífa rykið og öskuna burtu. Með því að sprauta fersku vatni í kanta hellstu stofnbrauta má minnka þetta vandamál mikið, en sópun er eina lausnin. Því ætti borgarstjórn frekar að nota fjármagn borgarbúa til að hefja þá vinnu strax, í stað þess að standa í svona tilraunastarfsemi sem séð er að engu mun skila nema enn meiri vanda.

Sem utanbæjarmaður ætti ég auðvitað ekki að vera að tjá mig um málefni Reykjavíkur. En stundum verður manni mál að tjá sig um heimsku manna, jafnvel þó hún sé sett fram sem grín!

 

Götur rykbundnar með saltpækli

Athugasemdir

[Vignir (IP-tala skráð) 19.3.2013 kl. 20:53]

Þekkt er að salt bindur raka og er það væntanlega sá eiginleiki sem nýtist við rykbindingu. Það er þá þríeining ryks, vatns og salts sem myndar bindinguna. Sem utanbæjarmaður hef ég séð þetta gert með góðum árangri á malarvegum. Væntanlega nýtist saltvatnið á malbiki til að skola burt rykinu ásamt því að mynda sambærilega rykbindingu og á malarvegum. Það eru nefnilega niðurföll á malbikuðum götum sem ekki eru til staðar á malarvegum. Að salt geri tjöruna deiga virðist rökleysa, því ekki sér þess merki á þeim malbikuðu götum sem sjór úðast yfir. 

Það yrði þokkalegt ástand sem mundi myndast ef fersku vatni væri beitt á malbikaðar götur í frosti, svo ekki gengur það dæmi upp. Að sprauta ferskvatni eingöngu í kanta hefur takmarkað gagn þegar rykið sem til vandræða er liggur á akbrautinni. Vonandi er ferskvatns tillagan bara grín!

[Gunnar Heiðarsson, 19.3.2013 kl. 21:25]

Ferskvatn er ekki notað í frosti Vignir, það vita auðvitað allir. Því bendi ég á að sópun sé eina raunhæfa leiðin.

Varðandi rykbindingu með salti, þá segi ég í mínum pistli að þetta sé þekkt aðferð á malarvegum. En að binda þunnt ryklag sem liggur á malbiki, er tilgangslítið. Þega rykið þornar og binds saman með saltinu myndast þunn skán sem brotnar upp þegar fyrsti bíll ekur yfir það. Það er mikill munur á því að nota salt til að rykbinda malarvegi eða til að binda þunnt ryklag á hörðu malbiki.

Hitt má satt vera að ef nógu mikið af saltpækli er úðað í rykið mun sjálfsagt eitthvað af því skolast niður í niðurföll, en saltpækill kostar peninga og víst að ekki verði notað meira af honum en rétt til að bleyta upp í rykinu.

Varðandi þá fullyrðingu mína að saltið auki átu malbiks, þá hef ég þar fyrir mér sænskar rannsóknir á þessu sviði, reyndar rannsóknir um áhrif nagla á malbik. Þar kemur skýrt fram að götur sem eru saltaðar étist mun meira upp en götur sem ekki eru saltaðar. Jafnvel segja sumar rannsóknir að ósaltaðar götur þar sem notkun nagladekkja er mikil, standist betur en saltaðar götur og minni notkun nagladekkja.

[Arnór Baldvinsson, 19.3.2013 kl. 21:39]

Sæll Gunnar,

Hérna er að mestu notaður fínn sandur til að bera á vegi og götur til að hálkuverja þegar þannig viðrar.  Þegar hlýnar eru sóparar sendir og þeir hreinsa þetta af vegunum þannig að það verður aldrei nein rykmengun að ráði.  Það frýs minna hér en í Reykjavík, þannig að þetta er ekki alveg sambærilegt og salt er líka notað hér þar sem frýs meira.  Hinsvegar eru sópunarbílar sendir til að hreinsa nokkuð reglulega til að koma í veg fyrir skemmdir á bæði vegum og bílum.

Kveðja,