Stefnubreyting?

Eru stjórnvöld að taka nýja stefnu í loftlagsmálum? Umhverfisráðherra kynnti fyrir stuttu nýja skýrslu, "Loftlagsþolið Ísland", þar sem virðist sem stefnan sé tekin á að aðlagast loftlagsbreytingum í stað þess að reyna að berjast gegn þeim. Eða er ráðherra kannski bara farinn að undirbúa sig fyrir næstu kosningar?

Reyndar er þessi skýrsla skrifuð eftir vinnu 300 einstaklinga í 13 "vinnustofum", svona eitthvað sovéskt fyrirbrigði, þannig að sennilega er hvorki hugur né hönd ráðherrans nærri þeim markmiðum sem þarna voru kynnt. Þá verður að segjast eins og er að hugmyndir skrifstofustjóra Veðurstofunnar, um endurreikning og aðlögun upplýsinga eitthvað sem erfitt er að átta sig á, að þar sé verið að spila hættuspil.

Ráðherra er hins vegar ekki í neinum efa um að þjóðaröryggi landsins sé undir í þessum málaflokk. Þó sé enn nægur tími til stefnu, ekki nein krísa. Að verkefnið sé einungis sem löng brekka sem komast þurfi upp.

Í annarri örlítið nýrri frétt er ráðherrann hins vegar kominn í gamla farið aftur, farinn að tala um baráttu gegn veðurbreytingum, í stað þess að ræða aðlögun að þeim. Þar kynnir hann eflingu loftlagsráðs.

Það væri gott ef ráðherrann gæti ákveðið sig. Það skiptir jú verulegu máli hvort við ætlum að reyna að breyta veðrinu eða aðlaga okkur að því. Litlar líkur eru á að fyrri kosturinn sé geranlegur en þann síðari er augljóslega framkvæmanlegur, hvort heldur er til þess að veður hlýni eða kólni. Báðir þessir möguleikar munu kosta landsmenn aukin fjárútlát, aukna skatta. Kosturinn við þann síðari er þó að þeir aurar munu kannski nýtast meira hér innanlands, meðan fyrri kosturinn mun koma andlitslausum erlendum aðilum best, mun flytja fé í miklu mæli úr landi.

Vonandi er þetta hringl ráðherrans ekki bara kosningabaul. Vonandi er hann farinn að átta sig á að við breytum ekki veðrinu, þó vissulega við getum aðlagað okkur að breyttum veðuraðstæðum.

Athugasemdir

[Ásgrímur Hartmannsson, 28.9.2023 kl. 13:57]

Það sem er að gerast, er að þinmgmenn eru smám saman að átta sig á að kolefnistrúin er ekkert vinsæl meðal almennings.

En það síast ekki hratt inn, því þeirra bergmálshellir er ekkert í neninum tengzlum við fólk eða veruleikann, og það eru menn þarna úti sem eru til í að borga mönnum fyrir að vera í költinu.

Annars hafa ráðamenn engar hugsjónir, svo þetta er allt baul.  Allt sem þeir segja. 

[Vagn (IP-tala skráð) 28.9.2023 kl. 17:41]

Að berjast gegn loftlagsbreytingum þýðir ekki að stjórnvöld telji að algerlega sé hægt að koma í veg fyrir þær. Ekki frekar en að baráttan gegn umferðarslysum sé háð vegna þess að þá sé hægt að koma algerlega í veg fyrir þau. Og það að þurfa að aðlaga sig að loftlagsbreytingum þýðir ekki að ekki þurfi að berjast gegn þeim. Rétt eins og við setjum tól og tæki í slökkvibíla til að losa fólk úr klesstum bílum þó við berjumst gegn umferðarslysum.

Hvernig getur verið nægur tími til stefnu þegar breytingarnar eru nú þegar eru farnar að sjást og tjón að hljótast af? Á meðan reynt er að halda breytingunum undir einhverju ákveðnu hámarki er ekki gáfulegt að gera ekki neitt fyrr en því hámarki er náð. Eða á að bíða með gerð varnargarða þangað til sjór flæðir yfir Reykjavíkurtjörn? Byggja áfram þar sem minna frost og meiri rigning getur skapað aurskriður?

Það skiptir jú verulegu máli að við reynum að takmarka breytingar á veðrinu og aðlögum okkur að þeim breytingum sem samt verða. Annað útilokar ekki á neinn hátt hitt og það er engin mótsögn í því að tala fyrir hvoru tveggja.

[Þorsteinn Jónsson (IP-tala skráð) 28.9.2023 kl. 18:00]

Mannkynið hefur alltaf þurft að aðlaga sig náttúrulegum veðurbreytingum og mun þurfa að halda því áfram.

Samkvæmt "pottþéttum spám" í kringum aldamótin átti að flæða sjór inn í Reykjavíkurtjörn árið 2020 og líklega fyrr. Það hefur nú ekki skeð.

En það glymur hátt í tómri tunnu!