Hvað kemur næst í borgarstjóra bragga blús

Braggi 267 milljónir, Sundhöll Reykjavíkur 350 milljónir, Mathús Hlemmi 201 milljón, Félagsbústaðir 300 milljónir og þrenging Grensásvegar ásamt hjólastígum 30 milljónir. Samtals gerir þetta 1.178 milljónir króna eða sem nemur launum verkamanns í rúm 368 ár!! Þarna er verið að tala um frammúrkeyrslu Reykjavíkurborgar í einungis 5 verkefnum, fleiri eiga eftir að koma, eins og t.d. viðhald Vesturbæjarskóla.

Brot á landslögum, brot á sveitarstjórnarlögum og brot á eigin reglum borgarinnar. Þetta kemur fram í fyrstu skýrslunni sem Innri endurskoðun Reykjavíkur hefur opinberað. Fleiri hafa verið boðaðar. Nokkuð harður dómur, sér í lagi þegar um er að ræða dóm innri endurskoðunar yfir sínum yfirmanni. Hvernig hefði dómurinn orði ef um óháða úttekt hefði verið að ræða. Og nú vill sá seki sjálfur rannsaka eigið afbrot.

Það er misjafnt í hvaða ljósi stjórnmálamenn sjá réttlætið. Einn gerist brotlegur um kynferðislegt ofbeldi. Flokkur hans tekur nokkra mánuði til að skoða málið í kyrrþey og úrskurðar. Annar sóar fjármunum á báða bóga, eða kannski bara í rétta vasa. Hann vill sjálfur fá að rannsaka brot sitt. Allt á þetta að fara hljótt og sjálfsagt hefði enginn fengið fréttir af kynferðisbrotinu nema fyrir óvarlega færslu þess seka. Svo fá nokkrir þingmenn sér í glas á bar. Einhverjir þeirra viðhafa ósæmilegt orðbragð og þjóðin ætlar að ganga af göflunum. Þegar þessir þingmenn óska eftir því við dómara að málið verði rannsakað, er því hafnað og nú lítur út fyrir að þeir þurfi að leita atbeina æðra dómstigs til að fá opinbera rannsókn á eigin broti!!

Hvort Dagur segi af sér eða ekki skiptir í sjálfu sér litlu máli, hann er jafn ómarktækur eftir sem áður og pólitískur ferill hans á enda kominn. Hitt ber að skoða, hvert þessir fjármunir fóru. Það er algerlega útilokað annað en að telja að rán hafi farið fram, að þjófar hafi þarna verið að verki. Hvort þar var um að ræða þjófnað með vitund og velvild embættis- eða stjórnmálamanna og þá hverra, þarf að upplýsa. Síðan að draga þá seku fyrir dómstóla. 

Tökum bara eitt lítið dæmi er úr þessum farsa öllum, plönturnar við braggann. Það má vera að hægt sé að kaupa nokkrar plöntur út í Danmörku og flytja þær til landsins fyrir tæpa milljón króna, þó erfitt sé að sjá hvernig. Hitt er aftur algerlega útilokað að kostnaður við að koma þeim plöntum niður í jörðina hafi kostað aðra eins upphæð. Opinber skýring á uppgerð braggans var að þarna væri verið að vernda söguna, nokkuð sem vissulega má alltaf gera meira af. Melgresi fellur vissulega að þeirri hugsun enda lítið um runna á Íslandi á þeim tíma er bragginn var upphaflega byggður. En hvers vegna Danskt melgresi? Við eigum gnógt af melgresi í landinu. Þetta er bara eitt dæmi um flónskuna, dæmi sem sýnir þó svart á hvítu að einhver eða einhverjir voru að fylla vasa sína af illa fengnu fé úr sjóðum borgarinnar!!

Dagur kemur fram í fjölmiðla bláeygður. Þórdís Lóa stendur sem klettur að baki hans. Hvernig Dagur hagar sér kemur ekki á óvart, hann hefur ávallt verið duglegur við að koma erfiðum málum yfir á aðra. Ef sést til myndavélar og kannski einhver stunguskófla er í nánd, er hann fljótur að stökkva fram úr fylgsni sínu. Það vefst hinsvegar nokkuð fyrir manni hvernig Þórdís Lóa hagar sér. Kannski eru einhverjir hagsmunir sem krossleggja þau?!!

Hvað kemur næst í borgarstjóra bragga blús?!!

Víkur sjálf ef Dagur víkur ekki

Athugasemdir

[Halldór Egill Guðnason, 23.12.2018 kl. 02:11]

 Næst koma gleðileg jól. "Ég er orðinn hress og allt sem illa hefur farið fjárhagslega, er hægt að skrifa á veikindi mín. Ég sé delluna mína og  skoða hana nánar á nýju ári, enda í nefnd um skýrsluna um sjálfan mig."

 Sjáumst hress og kát á nýju ári, þegar allt verður gleymt.

 Kveðja, Dagur B. Ekkert!

 Góðar stundir, með jólakveðju að sunnan. 

[Gunnar Heiðarsson, 23.12.2018 kl. 07:58]

Sæll Halldór Egill

Ekki kæmi á óvart þó Dagur tæki upp á því að bera veikindi sín fyrir sig, þegar hann verður uppiskroppa með fórnarlömb. Ekki ætla ég þó að gera lítið úr veikindum Dags, enda mér nokkuð nákomin, er sjálfur með sama krankleika. Í flestum tilfellum er þó ekkert mál að lifa eðlilegu lífi með réttri meðhöndlun, en ef Dagur er svo illa haldinn að slík meðhöndlun dugi ekki, á hann auðvitað að segja af sér, átti reyndar að gera slíkt þegar hann hætti að geta sinnt sinni vinnu skammlaust.

Kveðja og gleðilega hátíð

[Hörður Einarsson, 23.12.2018 kl. 17:39]

Dagur er ekkert að braggast.