1. maí, kjarasamningar og ESB

Þann fyrsta maí ár hvert fara forkólfar launafólks í sparifötin og halda ræður. Frá því ég var krakki, stuttu eftir miðja síðustu öld og allt til dagsins í dag, hafa þessar ræður verið fullar andgift þar sem samstaða og barátta er rauði þráðurinn. Þann 2. maí og allt fram til 30. apríl næsta árs, er sem þetta fólk hafi ekki heyrt eigin ræðu. Sem betur fer eru til undantekningar á þessari reglu, þó þær séu grátlega fátíðar.

Formaður BSRB kallar eftir samstöðu og segir hana kjarna kjarabaráttunnar. Samstöðu með hverjum? Sjálfum sér? A.m.k. er ekki að sjá mikla samstöðu hjá BSRB með þeim sem var nauðgað til að samþykkja kjarabót upp á 2,8%, síðasta vetur. Samstaða BSRB virðist vera um að fá mun vænlegri kjarabót en það. Vissulega má taka undir flest þau rök sem formaðurinn vísar til í sinni ræðu, en þau rök eiga ekki bara við félaga BSRB, heldur alls launafólks. Þá gagnrýnir formaðurinn aðgerðir stjórnvalda til hjálpar lánþegum. Það virðist vera að festast í sessi að þessir forkólfar launafólks telji sig vera þess umkomna að skipta sér af stjórnmálum. Breytir þar einu hvort um aðgerð er til hjálpar fólki eða ekki.   

Forseti ASÍ gengur heldur lengra. Enn hafa fréttamiðlar þó ekki flutt fréttir af ræðuhaldi Gylfa í dag, líklegt að ekkert félag hafi boðið honum til veislu. En þann 29. apríl voru tvær fréttatilkynningar fluttar frá honum, þar sem hann setti persónulegt met í bulli. Þann dag, fyrir hádegi, býsnast hann yfir því að ríkisstjórnin væri að hugleiða að setja lög á verkfall ákveðins launahóps, en þá virtist stefna þar í verkfall sem hefði lokað landinu frá umheimnum. Eftir hádegi ræðst hann gegn ríkisstjórninni fyrir að standa ekki vörð um þann kjarasamning sem gerður var í vetur og gaf launþegum skitin 2,8% í launahækkun. Það hefði verið allt í lagi fyrir manninn að láta líða a.m.k. eina nótt á milli þessara andstæðu yfirlýsinga.  

ASÍ gerði kjarasamning fyrir sína félagsmenn í desember síðastliðinn. Þessi kjarasamningur var hrein skelfing fyrir það fólk sem eftir þeim vinnur. Þessi samningur náði ekki að vinna upp það launaskrið sem aðrir höfðu fengið síðustu misseri á undan og ekki til að vinna gegn þeirri verðbólgu sem ríkt hafði síðustu tólf mánuði fyrir gerð samningsins. Hvað þá að launafólk fengi eitthvað til að vinna á því tapi sem það hafði orðið fyrir vegna hruns bankanna. Þessi kjarasamningur var hrein skelfing og öllum til skammar sem að honum komu.

Það kom líka á daginn, langt er síðan jafn mörg félög innan ASÍ hafa fellt kjarasamning eins og nú. Með brellum var þó hægt að snúa "villiköttunum til betri vegar" og lítilsháttar viðbót gerði samþykkt allra félaga að veruleika. Þar var einkum talað um stöðugleika og því lofaða að við hann skyldi staðið. Annaðhefur komið á daginn.

Í sjálfu sér var launafólk ekki ósátt við markmið samningsins, heldur aðferðarfræðina. Ef koma hefði átt á einhverskonar þjóðarsátt um stöðugleika, átti auðvitað að kalla alla aðila að borðinu. Slík sátt verður aldrei gerð af einum aðila, allir verða að koma að henni. Nú undrast forseti ASÍ að sumir taki á sig byrgðarnar en aðrir njóti. Hann á sjálfur allann heiður af því óréttlæti.  

En það er ekki bara aumingjaskapur við samningsborðið sem háir forseta ASÍ. Afskipti hans af pólitík er með öllu óþolandi. ESB aðdáun hans og hvernig hann nýtir ASÍ í þeirri baráttu sinni er ekki einungis óskiljanleg, heldur með öllu óviðunnandi. ASÍ eru samtök stéttarfélag, þar sem aðild er lögskipuð. Þetta er ekki pólitískur stjórnmálaflokkur með frjálsri aðild. Innan samtakanna eru nálægt eitt hundrað þúsund manns og víst að pólitísk viðhorf þessa fólks skiptast í svipuðu hlutfalli og í Alþingiskosningum. Því er undarlegt að forseti þeirra skuli gefa sér leifi til að taka afstöðu með einum ákveðnum stjórnmálaflokk, sem hefur innanvið fimmtung kjósenda að baki sér. 

Enn undarlegra er þó að forseti ASÍ skuli taka afstöðu með aðild að ESB, meðan kollegar hans innan þeirra ríkja sem sambandið mynda, eru önnum kafnir við að skipuleggja og leiða mótmælagöngur gegn sambandinu. Tugir og hundruð þúsund launafólks berjst gegn ESB á götum hellstu borga sambandsins. Þar er verið að mótmæla sífelldum skerðingum á réttindum launafólks og lækkun launa. Þær skerðingar eru gerðar í nafni "samkeppni" og þá auðvitað átt við samkeppni fyrirtækja. Þar er verið að mótmæla atvinnuleysi, sem er á þeim kvarða að við hér á Íslandi getum ekki með nokkru móti sett okkur í þau spor. Það atvinnuleysi sem hér varð fyrst eftir hrun og okkur þótti skelfilegt, þætti ekki mikið innan margra ríkja evrunnar!

Það þarf vissulega að mynda samstöðu meðal launafólks, sú samtaða ætti að vera um að koma Gylfa Arnbjörnssyni úr stóli forseta ASÍ, áður en honum tekst að rústa þeim samtökum að fullu. Það má enn bæta þann skaða sem Gylfi hefur unnið á ASÍ!!

 

Samstaðan kjarni baráttunnar

Athugasemdir

[Predikarinn - Cacoethes scribendi , 1.5.2014 kl. 17:27]

MAYDAY - SOS - MAYDAY

Enn eru björgunarsveitir, þyrlur landhelgisgæslunnar og löggæslumenn auk tugþúsunda sjálfboðaliða að leita skjaldborgarinnar sem átti að koma í upphafi þessa quadrennium horribilis, en því miður verð ég að hryggja lesendur hér að hún hefur eigi fundist.

Nú er búið að óska eftir aðstoð NATÓ - að það sjái til þess að allir kafbátar aðildarríkjanna verði sendir landið um kring til að vita hvort hún hafi hafnað á hafsbotninum einhvers staðar - því menn trúa nú ekki öðru en að einhvers staðar sé hún niður komin blessunin. Skjaldborginni var lofað með hátíðlegum og margítrekuðum hætti, eftir ákveðna helgi, ákveðna stórhátíð og mánuð. Menn gleymdu kannski að hlusta eftir því hvaða ár var átt við ?

En kafbátafloti NATÓ hlýtur að finna hana. Ef það gerist ekki þá er búið að senda fyrirspurn til NASA til að vita hvort eitthvert geimfar frá Canaveralhöfða hafi óvart krækt í skjaldborgina með einhverjum hætti. Hafi það ekki verið raunin þá verður óskað eftir því að öll geimför sem eftir eiga að fara á rúntinn verði beðin um að svipast um í geimnum eftir skjaldborginni og sömuleiðis að öllum stjórnendum geimsjónauka vítt og breitt verða beðnir að svipast um eftir henni sem og jeppakrílið sem ekur um á yfirborði Mars.

Hafi einhver upplýsingar um ferðir skjaldborgarinnar eða staðsetningu hennar er sá hinn sami beðinn um að láta vita hjá löggæslunni í 112 eða hjá NATÓ í [e-mail] eða NASA í 001 202 358-0000. Helst að gefa upp GPS hnit ef þess er nokkur kostur.