Ekki kemur til greina að ræða um undanþágur frá valdi ESB !

Hingað til hefur Mörður Árnason verið ötull stuðningsmaður ESB aðildar, en nú virðist sem honum hafi snúist hugur. Ekki að mikill fengur sé af Merði í lið þeirra sem eru á móti aðild, þó vissulega allur stuðningur sé vel þeginn.

Mörður segir:

" Um undanþágur frá yfirþjóðlegu valdi Evrópusambandsins, til að mynda forgangsáhrifum Evrópugerða fram yfir íslensk lög, segir Mörður slíkt ekki hafa verið rætt né koma til greina.

Almennt er þetta þannig að við erum að ganga inn í klúbbinn og í honum gilda reglur klúbbsins og í þeim málum sem varða tollabandalagið og innri markaðinn þá hlítum við þeim lagaramma sem Evrópusambandið hefur og það eru engar undanþágur í því."

Skýrara getur það varla orðið og í algeru samræmi við málflutning þeirra sem vilja að landið haldi sínu sjálfstæði og haldi sig utan ESB.

Hvenær á svo að hætta þessum leikaraskap? Það er löngu búið að sjá að það er ekki um neitt að semja þó aðildarsinnar, í einfeldni sinni, haldi enn fram að þjóðin geti ekki tekið afstöðu fyrr en samninganefndin kemur með "pokann" frá Brussel. Mörður staðfestir hér það sem allir málssvarar ESB hafa sagt hingað til. Að pokinn mun reynast tómur og ef við viljum komast í klúbbinn verðum við að hlíta þeim lögum og lofum sem klúbburinn ákveður og að ekki er um neinar undanþágur frá því að ræða. Innan þess klúbbs munu áhrif Íslands vega létt!!

Í ljósi þessara orða fulltrúa í utanríkismálanefnd hlýtur Alþingi að taka málið upp strax þegar það kemur saman. Kannski að Mörður taki það upp og leggi til að umsóknin verði dregin til baka?!

Það er nóg af gert í þessari andskotans vitleysu sem hefur klofið þjóðina og valdið meiri skærum innan hennar en nokkuð annað mál sem frá stjórnvöldum hefur komið!

Ef umsóknin verður dregin til baka gæfist kannski tími fyrir stjórnarherranna að vinna að því að standa við gefin loforð til vinnumarkaðarins. Þá mun losna um her manns sem sinnir aðlögunarferlinu og það getur snúið sér að öðrum og uppbyggjandi málum.

Þá mun einnig losna um haus stjórnarherranna, þeir geta þá séð að heimurinn er stærri en Brussel og að Ísland glímir við mikinn vanda sem nauðsynlegt er að leysa!!

 

ESB ekki að sækja um á Íslandi

Athugasemdir

[Stefán (IP-tala skráð) 12.1.2012 kl. 07:52]

Það hefur verið ljóst frá upphafi að ESB er ekki að fara að breyta sér til þess að Ísland geti bæst í hópinn.

Venjulega hafa þjóðirnar þurft að aðlaga sig að regluverki ESB.

Mér hefur fundist barátta ESB-sinna hafa verið á villigötum í mörg ár.

Ég sem ESB-sinni hef ekki skilið þessa umræðu margra íslenskra ESB-sinna.

Ég er á þeirri skoðun að Ísland muni hagnast af aðild að ESB.  Alveg eins og "áróður" ESB-sinna finnst mér umræða andstæðinga aðildar Íslands í ESB vera á villigötum.

En þetta er víst hin klassíska íslenska umræðuhefð. 

[Gunnar Heiðarsson, 12.1.2012 kl. 09:57]

Að vera ESB sinni er ekki endilega slæmt. Það fer eftir því hvernig menn fara með þá skoðun sína.

Þeir ESB sinnar sem telja að Íslandi sé betur borgið innan sambandsins, þrátt fyrir að við þurfum að gefa eftir vald okkar til Brussel, í veigamiklum málum, þrátt fyrir kosti og galla aðildar, eru heiðarlegir. Þetta er þeirra skoðun og ber að virða hana.

Þeir sem aftur telja að hægt sé að komast inn í sambandið með allskonar undanþágum, eru loddarar. Því miður ber meira á þeim hluta ESB sinna, en hinum sem eru hreinskilnir.

Ef baráttan væri réttlát væri hún á milli þeirra sem vilja ganga inn í ESB með kostum þess og göllum og okkar hinna sem teljum landinu betur borgið utan þess. Það er blaður hinna, sem telja að hægt sé að ná einhverjum samningum utan regluverks ESB sem skekkir myndina og ruglar fólk í rýminu. Ef sá hópur hefði ekki komið til er ekki víst að meirihluti hefði náðst á Alþingi fyrir aðildarumsókninni.

Alþingismenn eru breiskir eins og annað fólk og þeir létu þessa falsspámenn plata sig.