Kári og skemmdarverkin

Kári Stefánsson fór mikinn um helgina, eins og hans er von og vísa. Kannski telur hann að síðustu rannsóknir IE, þar sem fram kom að stæðsti hluti landsmanna er heimskur, gefi honum leifi til að tala til þjóðarinnar út frá þeim punkti.

En aftur að ummælum Kára. Þar segir hann forsætisráðherra vinna skemmdarverk á íslensku heilbrigðiskerfi. Að þessu kemst Kári eftir að hafa lesið hugrenningar forsætisráðherra um byggingu á nýjum landsspítala fyrir þjóðina og hvar best væri að staðsetja slíkan spítala.

Ekki gerir Kári þó eina einustu tilraun til að gagnrýna hugrenningar forsætisráðherra á efnislegum grunni. Fyrst og fremst ræðst hann að persónu forsætisráðherra, auk þess bullar hann bara gamla tuggu og klikkir síðan út með því að segjast mun ætla að nýta undirskriftasöfnun sína gegn núverandi stjórnvöldum. Það væri hins vegar svik við þá sem létu tilleiðast að rita nafn sitt í þá söfnun, enda skýrt tekið þar fram að ekki væri verið að ráðast gegn sérstökum stjórnvöldum, heldur afskiptaleysi allra stjórnvalda síðustu áratugi.

Ég er bara ósköp venjulegur Íslendingur, sem Kári skilgreinir sjálfsagt heimskan, samkvæmt þeim rannsóknum sem fyrirtækið sem hann vinnur hjá hefur komist að. En mér er annt um heilbrigðiskerfið og vil að við byggjum landspítala af reisn. Landspítala fyrir alla þjóðin, með góðu aðgengi og eins takmarkalausum stækkunarmöguleikum og kostur er, landspítala sem getur þjónað þjóðinni um langan tíma.

Þetta er útilokað við Hringbrautina í Reykjavík. Takmörkun lóðarinnar gerir það að verkum að ekki er hægt byggja þar undir alla þá starfsemi spítalans sem nú er þekkt, hvað þá þá starfsemi sem örugglega mun bætast við á næstu árum og áratugum. Aðgengi að Hringbrautinni er með því versta sem hugsast getur hér á landi. Gatnakerfið með þeim ósköpum að á álagstímum eru umferðatafir svo kílómetrum skiptir og nánast útilokað að bæta þar úr svo einhverju máli skiptir.

Þá er ótalið það óhagræði sem hlýst af stækkun og viðbótum við núverandi spítala. Smá smjörþefur hefur þó verið af slíku ástandi, síðustu daga, en umfangið á þó eftir að magnast mikið og standa yfir um langa framtíð.

Ef hægt er að byggja nýjan spítala á stað þar sem engar eða litlar truflanir verða á byggingatíma, er ljóst að byggingahraði getur orðið mun meiri og víst að slíkt myndi flýta mjög að nýr spítali komist í gagnið. Ef þetta er síðan hægt fyrir minna fé en ella, er hagurinn augljós. Og ef sú staðsetning verður valin með tilliti til stækkunarmöguleika, eftir því sem tækni fer fram á sviði heilbrigðismála næstu áratugina, ætti enginn að veltast í vafa um kostina.

Við Íslendingar erum gjarnir á að æða af stað án umhugsunar eða vandlegrar skoðunar á kostum. Þetta rennir vissulega stoðum undir rannsóknir IE á þjóðinni. Þarna má nefna mörg dæmi en ég læt duga að nefna tvö; Vaðlaheiðagöng og Landeyjarhöfn. Bæði þessi verkefni höfðu langan aðdraganda en þegar upp var staðið var skoðun og rannsóknir fjarri því að vera viðunandi og langt frá því að hægt sé að telja þessar framkvæmdir til sóma. Rökin þá eru þau sömu og nú, að of langt sé komið í ferlinu, að tafir gæti hlotist af ef málið verður skoðað frekar. Það er hverjum manni ljóst að meiri tafir hljótast af því að vaða blint út í fen, en ef tekinn er krókur framhjá því.

Verði af byggingu á nýjum spítala við Hringbraut mun sú framkvæmd fljótlega verða sett á sama bekk og Vaðlaheiðagöng og Landeyjahöfn. Innan fárra ára, löngu áður en verkinu lýkur, mun því verða komin upp sama staða, að spítalinn er of lítill og finna þurfi honum betri stað.

Það er í raun alveg stórundarlegt að enn skuli deilt um hvort betri staður sé til fyrir nýjan landspítala. Að menn skuli ekki heldur taka höndum saman um að finna spítalanum betri stað og einhenda sér í byggingu hans. Sér í lagi er undarlegt að forstjóri spítalans og verkstjórinn um byggingu hans skuli ekki opna augu og eyru fyrir þessu. Þvermóðskan ríður ekki við einteyming og svo sem allt í lagi þó menn sem koma þessu máli ekkert við séu helsjúkir af þeim sjúkdóm. Verra er þegar þeir sem um málið eiga að fjalla og eru fremstir í stafni þess að fá hér nýjan spítala, eru haldnir þvermóðskusýkinni.

Það er spurning hverjir eru meiri skemmdarverkamenn, þeir sem vilja æða áfram eins og naut í flagi og byggja spítalann á lóð sem allt mælir gegn, eða hinir sem vilja að spítalanum verði fundinn staður sem getur dugað til langrar framtíðar.

Að sjálfsögðu þarf að tryggja núverandi spítala nægt fjármagn til viðhalds og þeirrar starfsemi sem þar þarf að fara fram, þar til nýr spítali er tekinn í gagnið. Því má segja að þær framkvæmdir sem nú eru hafnar og hugsanlega einhverjar til viðbótar, séu réttlætanlegar. Sá kostnaður fæst til baka að hluta eða öllu leyti þegar síðan núverandi spítali verður seldur.

En markmiðið hlýtur að vera að finna spítalanum nýjan og betri stað og hefja þar framkvæmdir svo fljótt sem verða má. Að við tökum í dag það skref sem við að öðrum kosti þurfum að taka eftir örfá ár.

 

Bið eftir nýjum spítala yrði enn lengri

Athugasemdir

[Elín Sigurðardóttir (IP-tala skráð) 14.3.2016 kl. 09:32]

Það má vel vera að Íslendingar æði af stað með látum af og til.  Hótelbyggingar eru gott dæmi um það.  Forsætisráðherra vill láta breyta spítalanum í hótel.  Það er ekki góð hugmynd.  Spítalabyggingin hefur verið á dagskrá árum saman.  Nú er komið að framkvæmdum.  Við skulum fagna því.

[Óskar Helgi Helgason (IP-tala skráð) 14.3.2016 kl. 12:18]

Sæll Gunnar jafnan - sem og aðrir gestir, þínir !

Elín !

Íhugunarverð: þín orð, sem oftar.

Gunnar frændi, og síðuhafi !

Þú ert ÓTRÚLEGUR - einn þeirra míns frændgarðs (sem betur fer: örfárra), sem þykist geta borið hönd fyrir þetta ömurlega fyrirbrigði, sem forsætisráðherra titil ber, að óverðskulduðu.

Má vart: á milli sjá, hvor er hvor / Sigmundur Davíð, eða himpi gimpið austur í Norður- Kóreu Kim jong- Un, sem þarlendir eru nauðbeygðir til, að umbera, enn um stund, a.m.k.

Íslendingar - þrátt fyrir Heimsfræga deyfð:: stjórnmálalega, eiga þó að hafa meiri möguleika til, að kasta flóninu hér (Sigmundi Davíð Gunnlaugssyni) fyrir róða, en Kóreönsk alþýða, Norðanverð, sínum stórskemmda grip.

Reyndu svo ekki: að gera samanburð á þeim Kára og Sigmundi Gunnar minn, þrátt fyrir ýmsa meinbaugi Kára Stefánssonar, er hann þó mennzkur í framgöngu - EKKI stjórnarráðs Skoffínið, frændi minn sæll !!!

Með beztu kveðjum: sem oftar - af Suðurlandi /  

[Gunnar Heiðarsson, 14.3.2016 kl. 14:51]

Sæll frændi.

Þú leggur mér orð í munn í þinni athugasemd. Hvergi mæri ég Sigmund Davíð í minni grein, þó ég minnist á skrif hans að litlu leyti, enda þau nokkuð efnismeiri en skrif margra annarra í þessu máli.

Nýtt sjúkrahús fyrir okkur landsmenn er stærra dæmi en svo að persónur skipti þar máli. Þarna er ætlunin að byggja stórt og mikið sjúkrahús fyrir mikla peninga. Það hlýtur að vera lágmarkskrafa að að því verki verði staðið af myndarskap og einhverri örlítilli skynsemi.

Það staðarval sem hefur verið ákveðið undir þessa byggingu er á allan hátt eins önugt og hugsast getur. Bletturinn allt of lítill strax í upphafi og ekki hægt að koma því fyrir á honum sem þörfin í dag heimtar, hvað þá þörf morgundagsins. Aðkoman getur vart fundist verri á gjörvöllu Íslandi.

Við skulum því ekki gleyma okkur í andúð á menn í þessu máli, heldur snúa okkur að efninu og því að reyna að koma spítalanum á einhvern vitibornari stað frændi, svo ekki þurfi að horfa upp á annað Landeyjar- eða Vaðlaheiðaslys.

Með bestu kveðjum héðan af Skipaskaga.

[Ásmundur (IP-tala skráð) 14.3.2016 kl. 16:39]

Það er með ólíkindum að forsætisráðherra skuli eins og hver annar ábyrgðarlaus ræfill, án samráðs við ráðherra eigin ríkisstjórnar, tala svona gegn ákvörðun ríkisvaldsins.

Ákvörðunin hefur verið endurskoðuð af sérfræðingum hvers heilbrigðisráðherrans á fætur öðrum sl áratug eða meira og niðurstaðan hefur alltaf verið hin sama.

Tími ákvörðunar um staðsetningu spítalans er auðvitað löngu liðinn enda þegar búið að verja milljörðum í verkið. Þar eru eflaust þyngst á metunum barnaspítalinn, færsla Hringbrautar og hönnun.

Maður spyr sig hvort forsætisráðherra sé að reyna að koma í veg fyrir byggingu spítalans svo einkavæðing heilbrigðiskerfisins fái framgang.

Allavega er ljóst að ef svona upphlaup hefur þau áhrif sem því er ætlað þá mun opnun nýs spítala tefjast um mörg ár með skelfilegum afleiðingum.

En kannski er SDG bara að hugsa um næstu kosningar. Hann heldur kannski að hann geti náð í mörg atkvæði með þessum hætti. Hann veit af reynslu að það er auðvelt að plata marga kjósendur. Það er þó óvíst að það virki aftur. 

[Gunnar Heiðarsson, 14.3.2016 kl. 17:17]

Það er magnað hvað menn eru fljótir til að hlaupa í manninn í stað boltans. Hvaða helvítis máli skiptir hvaða persóna það er sem talar, er ekki efnisinnihaldið sem máli skiptir?

Ásmundur þú segir að hver heilbrigðisráðherrann af öðrum, síðastliðinn áratug, hafi látið endurskoða staðarvalið og niðurstaðan alltaf verið sú sama. En hversu margar raunverulegar kannanir hafa verið gerðar? Engin, akkúrat engin!

Í upphafi var fengið álit erlendra sérfræðinga um staðarvalið. Þeirra vinna var þó bundin höftum og fengu þeir sérstaka tilsögn um hvað þeir skyldu skoða og meta. Út frá þeim höftum komust þeir að þeirri niðurstöðu að Hringbraut væri í sjálfu sér ekki verri kostur, en alls ekkert betri heldur. Þetta var um síðustu aldamót og mikið vatn runnið til sjávar síðan.

Allar "kannanir" síðan þá hafa einungis verið yfirlestur upphafsskýrslunnar og auðvitað verður niðurstaðan alltaf sú sama.

Ef menn gæti náð sér af stalli flokkspólitíkur í þessu máli og sameinast um að finna spítalanum stað til framtíðar, stað sem uppfyllir stækkunarþörf hans um langa framtíð. Sameinast um að gera þetta fljótt og vel og hefja framkvæmdir svo fljótt sem verða má, er ljóst að enginn stjórnmálaflokkur getur haft hagnað af þessu máli í kosningum.

Hins vegar ef menn velja að flækja þetta mál í pólitískar deilur, er eins víst að það sitji áfram í sama fari og undanfarin sextán ár.

Kannski lýsir sú staðreynd, að allir heilbrigðisráðherrar síðustu tíu ára hafa talið þörf á endurskoðun staðarvals, einmitt best þeirri ósátt sem um Hringbrautina hefur verið frá upphafi.

Það er verst að enginn þessara ráðherra hafði kjark til að gera alvöru könnun um málið, að fá óvilhalla menn með þekkingu á málinu, til að skoða það, án allra hafta eða tilsagnar. Þá værum við kannski farin að sjá fyrstu hæðirnar rísa á nýjum spítala á betri stað.

Auðvitað þarf samhliða þessu að tryggja að nægt fé sé til landspítalans og honum tryggður rekstrargrundvöllur, uns nýr spítali verður tilbúinn. Hægt er að stækka rými spítalans töluvert með því að byggja ódýrt húsnæði, jafnvel halda áfram að gámavæða við hann, fyrir þá starfsemi innan stofnunarinnar sem ekki snýr beint að lækningu sjúkra. Engin nauðsyn er að skrifstofur séu að taka pláss innan veggja stofnunarinnar.

Reyndar skiptir engu mál hvar spítalinn verður byggður, gagnvart þessari tryggingu, hún verður alltaf að vera til staðar. Kannski mætti stytta þann tíma sem slík trygging þarf að gilda, með því að byggja á stað þar sem byggingahraðinn getur orðið meiri.

[Ásmundur (IP-tala skráð) 14.3.2016 kl. 19:01]

Gunnar, að sjálfsögðu ræði ég ekki hugmyndir SDG því að það er ekkert nýtt í þeim. Fréttin er ekki hugmyndir hans heldur að það skuli vera sjálfur forsætisráðherrann sem hagi sér svona. Þess vegna get ég ekki annað en farið i manninn.

Fyrir utan að þessi staðsetning hefur verið staðfest margsinnis hefur SDG aldrei haft haft uppi neinar mótbárur gegn henni fyrr en nýverið. Finnst þér það trúverðugt? Það einkennir þá sem eru mest á móti Hringbraut að þeir voru fjarri góðu gamni þegar umræðan fór fram og enn var raunhæft að hætta við Hringbraut. Það er því erfitt að taka mark á þeim.

[Gunnar Heiðarsson, 14.3.2016 kl. 20:46]

Það er hárrétt hjá þér Ásmundur, þessar hugmyndir eru ekki nýjar, hafa reyndar verið í umræðunni alveg frá upphafi. Þær hafa hins vegar aldrei hlotið hljómgrunn, enda ákveðin öfl sem ekki mega heyra minnst á annað en Hringbrautina.

Einmitt þess vegna, að hugmyndin er ekki ný,er svo skondið að heyra og sjá viðbrögðin. Þau eru sterk vegna þess að forsætisráðherra tekur undir þessi sjónarmið. Flokkspólitíkin er alveg að drepa sumt fólk og því fólki er útilokað að ræða nokkurn skapaðan hlut nema með flokkpólitískum augum.

Hvort ráðherrann hefur sýnt nákvæmlega þessari staðsetningu áhuga, þ.e. Vífilstöðum, veit ég ekki. Hitt er ljóst að hver sem snýr af trúvillu og ákveður að horfa áhlutina með opnum augum, er betri maður. Og af einhverjum ástæðum náðist ekki samþykkt um Hringbrautina í stjórnarsáttmálann.

Þeir sem hafa verið andsnúnir staðsetningu nýs landspítala við Hringbraut hafa vissulega látið til sín heyra, allt frá upphafi. Andstaðan við það staðarval hefur verið sterk allt ferlið. Eða af hverju heldur þú annars að allir ráðherrar síðustu tíu ár hafi talið sig þurfa að fá staðfestingu á staðarvalinu? Skömm þeirra er að hafa aldrei haft kjark til að gera þá könnun af viti! 

[Sindri Karl Sigurðsson, 14.3.2016 kl. 20:56]

Það er nú í hæstalagi undarlegt þegar fréttafólk er dregið inni í bílskúr Landspítalans til að láta mata sig af "staðreyndum" stjórnenda spítalans.

Á næstu hæðum eru tómar álmur með herbergjum og tilheyrandi, það er ekki rætt né skoðað. Síðan kemur hraunið yfir svartan sand þessar stjórnenda, þegar loksins og ég segi loksins, fagfólkið og þeir sem þurfa að vinna verkin, sjá þessari staðsetningu og framkvæmdaraski, allt til foráttu.

Síðan þykist Kristján ekkert vita af þessu... Ja hérna hér.

[Óskar Helgi Helgason (IP-tala skráð) 14.3.2016 kl. 23:20]

Sæll á ný Gunnar - og aðrir gestir, þínir !

Mér þykir fyrir því Gunnar minn: hafi ég lesið rangt í ályktanir þínar, því fjarri er það mér yfirleitt, að snúa út úr hlutunum, þegar um alvöru mála er að ræða, hverju sinni.

Vil ég því - biðja þig afsökunar, á þessarri fljótfærni minni, hér með.

Hins vegar: er ég fyllilega sammála þér um, að vanda skyldi vel til verka alls staðarvals fyrirhugaðra framkvæmda, sem hér eru til umfjöllunar / þó: óbreytt sé álit mitt, á ónýti sem fánýti, þorra ísl. stjórnmálamanna sem slíkra, eftir sem áður.

Með ekki síðri kveðjum - hinum fyrri, og áður /

[Halldór Egill Guðnason, 15.3.2016 kl. 00:59]

Þakka góðan pistil Gunnar. 

Meðan fólki, sem einungis hefur fjögurra ára ráðningarsamning, með ekki nokkurri einustu trygging um áframhaldandi starf, er treyst fyrir skuldbindingum til hálfrar eða jafnvel heillrar aldar, getur útkoman aldrei orðið góð. Aldrei hefir Ísland hýst aðra eins amlóða á þingi, borgarstjórn eða nánast hvar sem borið er niður í stjórnkerfinu. Að geta ekki einu sinni hlúð að sjúkum og særðum, í landi allsnægtanna og "Iceland got talent"ber vott um aumingjahátt.

Kári er fínn á margan hátt. Frekari en andakotinn og að því er virðist, ekkert mjög orðheldinn. Platar fólk til undirskrifta og hótar síðan að nota þær í eitthvað annað! Du du du, Kári, svona gerir maður ekki.

 Hægt væri að byggja mörg hús fyrir þá orku sem Íslendingar nota í að rífast, á ári hverju. Við rífumst út um rassgatið á okkur á hverjum degi og nú er jafnvel rifrildið sjálft orðið algert aukaatriði, þ.e.a.s. Hvað rifist er um. Rífast "no matter what!"

 Kári karlinn er ágætur á margan hátt. Hann mætti hins vegar muna það endrum og sinnum að það var ég, Jón og Gunna, gegnum loforð vinar hans, sem gerir honum kleift að rífa kjaft í dag. Margt sem hann segir er alveg ágætt, en flest þó meira og minna almenns eðlis og sagt án ábyrgðar(the american way) Upp hoppar auðvirðileg blaðamannasrétt landsins og allt verður vitlaust. Væri sennilega ágætis herkænskubragð hjá Kára að halda kjafti um stund og snýta sér á undirskriftum, sem logið var til um tilgangs til.

Er að hugsa um að ganga í lið með forsætisráðherra landsins. Gerast skemmdarvargur, eins og Kári segir. Skal án nokkurar utanaðkomandi aðstoðar játa mig heimskn og leggja til að næsta almennilega sjúkrahús sem þjóðin byggir, með eða án  Kára frekjudalls og undirskriftagosa, rísi í landi Blikastaða.

 Blikastaðir eru gríðarstórt landsvæði sem liggur milli Mosfellsbæjar og Grafarvogshverfis Reykjavíkur. Eftir um það bil fimmtíu ár verður þessi staðsetning þungamiðja höfuðborgarsvæðisins. Andakotinn sjálfur, ef ekki væri jafnvel hægt að koma flugvelli að í leiðinni.

 Góðar stundir, með kveðju að sunnan.