Að kljúfa flís

Kratar þessa lands eru í sárum, sárum eigin væringa. Orðræðan sem verið hefur frá landsfundi og að lang stæðstum hluta kemur frá krötum sjálfum, hefur verið óvæginn, jafnvel svo að stundum verður maður orðlaus. Hitt má satt vera hjá Össur að sennilega munu þessar deilur ekki kljúfa Samfylkinguna, enda erfitt að kljúfa flís!

Það er með ólíkindum þegar fram á völl fjölmiðla hlaupa stofnendur Samfylkingar og halda því fram að þarna hafi verið reynd yfirtaka á flokknum, að vegið hafi verið úr launsátri og jafnvel talað um "móðurmorð". Þessir stofnendur þessa krataflokks sömdu sjálfir reglur flokksins og þær reglur heimila kosningu formanns á landsfundi. Svo einfalt er það. Og hvers vegna datt engum af því fólki sem gagnrýnir svo heiftarlega framboð Sigríðar Ingibjargar að fara fram á breytingu á lögum flokksins, svo þessi staða gæti ekki komið upp. Það er hrópað að brotið hafi verið á lýðræðislegri hefð, að brotið hafi verið á rétti hins almenna krata. Hvers vegna var það þá ekki lagað? Getur verið að þetta sama fólk vilji halda þessum möguleika opnum, ef það sjálft kýs að nýta sér hann?

Eitt er ljóst og hefur verið um langa hríð, krataflokkurinn Samfylking er margskiptur. Tilurð hans var þannig búin að eining er eitthvað sem erfitt er að samræma í þessum flokk. Hins vegar hefur stundum tekist að fela þessa misklíð fyrir landsmönnum og vissulega tókst þeim Össur og Ingibjörgu það vel, eftir að sá fyrrnefndi þurfti að lúta í lægri hlut fyrir þeirri síðarnefndu. Það var þó ekki að sjá neina vængi á krötum eftir þá hildi, þó verið geti að Össur hafi svifið um í einhverri sælu.

Það er þó sennilegt að kosningin nú dragi á eftir sér stærri dilk en kosningin milli ÖS og ISG. Ástæðurnar eru einkum tvær. Nú hafa kratar um fleiri flokka að velja, ekki bar einn eins og var árið 2005. Verri er þó síðari ástæðan. Umræðan og hversu rætin hún hefur verið mun skilja eftir sár sem erfitt eða útilokað er að græða. Nú hefur Sigríður Ingibjörg komið fram og sagst muni endurskoða sína stöðu. Skyldi engan undra, það þarf sterk bein í stjórnmál en þegar samherjar ráðast jafn harkalega gegn viðkomandi þarf eitthvað sterkara en bein!

Það sem kannski mest hefur komið á óvart í umræðunni er undirlægjan fyrir húsbóndavaldinu, sem virðist einkenna krata. Jafnvel þó einungis einu atkvæði hafi munað í kosningunni er eins og flestir þeirra sem kusu SII hafi verið fljótir að skipta um skoðun, þegar úrslit lágu fyrir. Kjarkurinn er ekki meiri en svo að fæstir þeirra þora að standa að baki henni og verja, í allri þeirri rætnu umræðu sem kratar stunda á hendur henni. Það er ljótur leikur, leikur hugleysingjans.

Ég vil taka skýrt fram að ég er ekki krati og hef því enga skoðun á frambjóðendunum sem slíkum. Geri ekki greinarmun á hvor væri betri fyrir Samfylkinguna, né sé muninn þar á. Skrif mín beinast fyrst og fremst að þeirri rætnu umræðu sem kratar hafa stundað, frá því niðurstaða kosninga lá fyrir. Ég hafði ekki hugsað mér að rita neitt um landsfund þessa flokks, enda kemur mér hann ekki við, en það er ekki hægt annað en að gagnrýna framferði krata, í kjölfar þessa fundar. Sér í lagi þegar þeir sem harðast láta og óvægastir eru í orðum, eru einmitt þeir sömu og rituðu stofnskrá flokksins. Það voru þeir sem buðu upp á að svona staða gæti komið upp, en þora ekki að bera þá ábyrgð!!

Hver framvindan verður innan Samfylkingar á næstu dögum og misserum er ekki ljóst. Þó er ljóst að ekki er lengur hægt að kljúfa þennan flokk, enda erfitt að kljúfa flís. Víst er að sumir munu ganga úr Samfylkingunni, sumir yfir í aðra flokka og aðrir munu einfaldlega draga sig í hlé. Í kjölfarið mun Samfylkingin leggjast af. Kannski verður Árni Páll síðasti formaður Samfylkingar.

Þá munu orð Össurar vissulega sannast að flokkurinn fái vængi. Vængi hins látna. Og víst er að lítil flís þarf ekki stóra vængi.

„Vængjaðir flokkar taka oft flugið“

Athugasemdir

[Ásthildur Cesil Þórðardóttir, 22.3.2015 kl. 23:10]

Frábær pistil hjá þér gunnar. 

[Elín Sigurðardóttir (IP-tala skráð) 23.3.2015 kl. 08:24]

"Ég hef aldrei getað tekið þátt í Samfylkingunni á sama hátt og áður eftir móðurmorðið á Sollu" segir Kristrún Heimisdóttir.  Er hún ekki að vísa í Samfylkingarfundinn 21. janúar 2009?  Síðan þá hafa sonur og eiginmaður Ingibjargar Sólrúnar sagt sig úr Samfylkingunni.  Finnnst þér líklegt að þetta fólk sé að pæla í að halda einhverjum möguleika opnum innan Samfylkingarinnar?  Þú segir að það þurfi eitthvað sterkara en bein þegar samherjar ráðist að viðkomandi.  Á það eitthvað meira við um Sigríði Ingibjörgu en Ingibjörgu Sólrúnu?

[Gunnar Heiðarsson, 23.3.2015 kl. 17:16]

Takk Ásthildur.

Elín, það hafa fleiri verið stóryrtir eftir þennan landsfund en Kristrún, þar á meðal margir sem sátu þennan fund. Það var í hendi þeirra að sjá svo um að þessi leikur endurtaki sig ekki, ef þeim er svo annt um lýðræðið innan eiginn flokks, sem þeir láta. Enginn stakk þó upp á að breyta lögum flokksins í þá veru. Hvers vegna?

Ekki man ég eftir miklum árásum á ISG, eftir að hún felldi Össur, í það minnsta ekkert í líkingu við þær árásir sem nú herja á SII.Því þarf ISG ekki neinar hækjur vegna þeirra pólitísku deilna.

Ef þú átt við það sem Kristrún kallaði "móðurmorð", þegar ISG var sett af sem formaður og JS tók við, þá átti það sér stað utan landsfundar, í reykfylltum bakherbergjum Samfylkingarinnar, sem við utanflokksmenn urðum lítt varir við. Fjölmiðlar fjölluðu á mildann hátt um þau formannsskipti og engin rætin skrif urðu vegna þeirra. En eins og áður segir, þá getur verið að mikið stríð hafi verið háð innanflokks á þessum tíma og vel getur verið að einhver móðurmorð hafi verið framin.

Hafi svo verið, að miklar erjur og svik hafi verið gagnvart ISG veturinn 2009, er ljóst að hún er jafnsett SII varðandi þörf fyrir eitthvað sterkara en bein. Því geta þó einungis þeir kratar svarað sem voru í innsta koppi Samfylkingar á þeim tíma. Þær erjur og þau svik voru ekki opinberuð þjóðinni.

[Elín Sigurðardóttir (IP-tala skráð) 23.3.2015 kl. 19:35]

Mér fannst vera einhver ærlegur tónn í þessu hjá Kristrúnu.  Gat ekki séð fyrir mér að hún væri svekkt yfir því að geta ekki nýtt sér einhverja glufu.  Kannski að hinir í flokknum hafi verið til í það og því ekki breytt lögunum.  Það má vel vera.