Ljós í grámanum

Í öllum þeim gráma sem veðurguðirnir hafa haldið yfir hausamótum okkar sem búum hér á vestari hluta landsins, gráma sem er farinn að setja mark sitt á sálina enda annað sumarið í röð sem virðist ætla að fara framhjá okkur, kemur lítill ljósgeisli. Þessi litli ljósgeisli er þó ekki frá veðurguðunum kominn, heldur tveim kunnum pólitíkusum, Jókernum og Grínistanum. 

Þegar þau gleðilegu tíðindi bárust að ESB væri búið að loka á aðildarumsókn allra ríkja nema þeirra sem eru núna í aðlögun og Ísland er vissulega ekki í aðlögun lengur, risu þessir tveir menn úr rekkju og fluttu okkur sinn hvorn skemmtiþáttinn. Þetta létti vissulega lundina, ásamt þeim gleðitíðindum sem hinn nýji einræðisherra ESB gaf út.

Jókerinn (Árni Páll) sagði við þetta tækifæri að nauðsynlegt væri að halda aðildarviðræðum áfram. Við hvern hann ætlar tala er svo spurning. Í það mynnsta er ljóst að hann fær ekki áheyrn ráðamanna ESB. 

Grínistinn (Össur) bætti um betur og sagði þetta smellpassa við hans hugmyndir. Að þetta passaði við hans hugmyndir um að af loknum næstu kosningum myndi ný ríkisstjórn hefja þessar viðræður að nýju. Það hefur alltaf þótt merki um vitsmuni að bíða með siguróp kosninga þar til talið hefur verið upp úr kjörkössum. Hitt ber líka að athuga að jafnvel þó svo undarlega vildi til að Grínistanum og Jókernum tækist að komast í næstu ríkisstjórn, þá yrðu þeir að fórna a.m.k. helming þess kjörtímabils í bið eftir að geta hafið viðræður. Það er hætt við að stórt spurningamerki kæmi á andlit ráðamanna í Brussel, ef þeir félagar mættu þar í þeim tilgangi að hefja viðræður að nýju, viðræður sem Grínistinn sjálfur formlega stöðvaði í lok árs 2012, eftir að ESB hafði raun sett þessar viðræður í strand ári fyrr.

Það er alltaf gaman þegar lund manns er létt og grínistar láta vaða á súðum. Það sem þó skyggir örlítið á þessa gleði eru hugmyndir utanríkisráðherra. Hann telur í sakleysi sínu að þessi yfirlýsing hins nýja einræðisherra ESB vera einhvern lokapunkt á málinu. Það er þó alldeilis ekki svo. Þetta er yfirlýsing um frestun, svona í anda þess sem Grínistinn gerði undir lok árs 2012. Munurinn er að einræðisherrann setur tímamörk á frestunina, en Grínistinn hafði sína frestun ótímasetta.

Það er mikill munur á frestun og lokum. Utanríkisráðherra getur, ef henn er ekki alveg klár á þessum mun, flett upp í orðabókum, því til staðfestingar. Því er málinu alls ekki lokið, því líkur ekki fyrr en umsókn hefur verið dregin til baka.

Best væri auðvitað að koma því svo fyrir að aldrei yrði sótt um aftur nema að undangenginni þjóðaratkvæðagreiðslu, þar sem hugur þjóðarinnar til aðildar yrði kannaður. Þó má segja að slík krafa sé óþörf, enda má ætla að þeir sem veljast á þing hafi lært sína lexíu, sagan af frumhlaupi Samfylkingar sumarið 2009 mun lifa um aldir. Þá er alveg ljóst að framkvæmdastjórn mun taka öðrum höndum á ósk um aðild frá Íslandi, en gert var 2009. Það skilyrði til umsóknar að vilji þings og þjóðar væri til staðar mun vega þyngra næst þegar sótt verður um aðild. Því má segja að jafnvel þó jafn vitundarskert fólk ná aftur völdum á Alþingi, eins og vorið 2009, mun framkvæmdastjórn ESB ekki samþykkja umsóknarósk Íslands við sömu aðstæður og þá. 

Umsóknina, sem nú liggur dauð í Brussel, þarf að draga til baka og jarða með viðeigandi hætti. Þessi bastarður var borinn í heiminn á grunni svindls og því ber stjórnvöldum að draga umsóknina til baka og bæta fyrir syndir fyrri ríkisstjórnar. Þá er lágmarks krafa að stjórnvöld standi við gefin loforð. Þó hér hafi ríkt ríkisstjórn sem virtist hafa það hellst að markmiði að svíkja sína kjósendur, er ekki þar með sagt að það sé orðið eitthvað lögmál. Núverandi ríkisstjórn er ekki bundin því að stunda sömu svikabrögðin og sú síðasta, en kjósi hún svo, munu afleiðingarnar verða svipaðar og hjá þeirri síðust. Ef ég man rétt talaði Grínistinn um hamfarir í því sambandi! 

Nú vantar bara skýr skilaboð frá utanríkisráðherra um að fyrsta verk hanns á komandi þingi verði að leggja aftur fram tillöguna um afturköllun aðildarumsóknarinnar. Þá mega veðurguðirnir senda okkur allt það regn sem þeim sýnist, sólin myndi samt skína í heiði!!

 

Afturköllun til skoðunar

Athugasemdir

[Jós.T (IP-tala skráð) 17.7.2014 kl. 12:41]

ESB er ekki búið að loka á aðildarumsókn allra ríkja. Jafnvel þó Jean-Clau­de Juncker verðandi for­seti fram­kvæmda­stjórn­ar ESB hafi boðað það er hann lýsti fyr­ir­huguðum áhersl­um í for­setatíð sinni. Hann verður ekki einráður og ESB hefur ekki fjallað um þessa ósk. Það vill svo til að einstakir embættismenn ESB geta haft sínar óskir og væntingar en ESB setur stefnuna.

[Bergljót Gunnarsdóttir, 19.7.2014 kl. 01:01]

"Gáfur eru Gull" sagði einhver frómur maður um árið. Mér sýnist Ísland ekki hafa verið að ala upp neina gulldrengi í pólitíkinni þegar kemur að aðild okkar að ESB. Maður er eiginlega orðlaus.