Því miður !!

Því miður erum við sennilega búin að missa hina vinsælu Næturvakt Guðna Más. Eins og hann bendir á þá verður víst að standa við auglýsta dagskrá. Nú liggur fyrir dagskrá fyrir næstu tvær helgar og þar er þessi ágæti þáttur ekki nefndur. Þess í stað verður endurtekið efni, sumt sem búið er að endurtaka oft áður. Þetta eru ekki gleðifréttir fyrir hlustendur Rásar 2.

Það er svo spurning hver sparnaður ruv er af þessari breytingu. Í stað Guðna Más mun koma einhver annar sem fylgist með spólunni í tækinu og skellir inn auglýsingum eftir þörfum. Hins vegar munu hlustendur ekkert verða varir við þann mann, þar sem hann mun sitja hljóður við borðið, kannski sama borð og Guðni Már er vanur að sitja við. Því verður vart séð að einhver sparnaður náist fram með þessari breytingu, önnur en mun lélegri dagskrá.

Meðan Guðni Már er tilbúinn að stýra þessum þætti á auðvitað að leifa honum það. Þetta er einn örfárra þátta þar sem hlustendur geta hringt inn og eini þátturinn þar sem þeir fá að velja sjálfir þau lög sem spiluð eru. Þetta kemur fram í því að í þætti Guna Má eru önnur lög spiluð en jafnan heyrast á þessari útvarpsrás og segir það kannski þá sögu að almennt séu stjórnendur útvarpstöðvarinnar ekki í takt við hlustendur. Þessi þáttur á ekki sinn líkann í íslensku útvarpi í dag, þó slík dagskrárgerð hafi þekkst í meira en hálfa öld víða erlendis og þar ekki síður vinsælir en Næturvakt Guðna Más.

Þeir þættir sem munu koma þarna í staðinn, a.m.k. næstu tvær helgar, voru svo sem ágætir á þeim tíma er þeir voru frumfluttir. En það er búið að endurflytja þessa þætti og það nokkuð oft. Þá er lagavalið fjarri því að vera jafn fjölbreytt og í þætti Guðna Más, þar sem hlustendur sjálfir fá ráðið.

Það er því útséð að næstu tvær helgar verðum við án næturvaktarinnar, hvað sem á eftir kemur. Meðan ekki hefur verið rökstuddur sá sparnaður sem fæst fram með þessari breytingu, verður ekki annað séð en að annað hvort séu stjórnendur ruv svona langt frá því að vera í tengslum við rekstur stöðvarinnar og hlustendur hennar, eða þeim er beinlýnis illa við hlustendur. Hvor ástæðan sem er, gerir þá með öllu vanfæra að sinna sínu starfi!!

 

Guðni Már er ennþá á RÚV