260.416 krónur í mánaðarlaun án vinnuskyldu

Á næsta ári munu heiðurslaun listamanna verða að meðaltali 3.125.000 kr, eða um 260.416 kr á mánuði. Hvort þetta eru hæfileg laun til þeirra sem eru svo heppnir að veljast sem listamenn Íslands skal ósagt látið. Það má í því sambandi kannski benda á að lægstu laun samkvæmt kjarasamningum eru í dag 191.000 kr og af ofrausn sinni hafa atvinnurekendur boðið því fólki sem þau laun fær fyrir fullann vinnudag og fullt vinnuframlag, heilar 3.820 krónur. Þá munu laun þessa fólks ná 194.820 krónum á mánuði, fyrir fulla vinnu og fullt vinnuframlag.

Því má velta fyrir sér hvort 260.416 krónur á mánuði í heiðurslaun, þar sem ekki neins vinnuframlags er krafist né neinnar vinnuskyldu, sé hæfileg greiðsla.

Það er ljóst að flestir þessara listamanna hafa tekjur af sinni listsköpun og sumir einnig aðrar tekjur, jafnvel hægt að sjá fyrrverandi þingmenn á þessum heiðursmannalista, en enginn verður svangur sem þiggur laun úr eftirlaunasjóði þeirra.

Allir þeir sem veljast sem heiðurslistamenn Íslands fyrir næsta ár eru ágætir listamenn, eins og svo fjölmargir aðrir sem ekki eru á þessum lista. En eins og áður segir hafa margir þeirra ágætis tekjur af sinni listsköpun, enda besti mælikvarði á list hvort einhver er tilbúinn að njóta hennar. Sá sem fremur listsköpun sem enginn vill sjá getur varla talist mikill listamaður.

Það er víst að þessum 75 milljónum króna hefði mátt velja til betra málefnis en til launa án vinnuframlags. Það er jafn ljóst að hægt er að heiðra listamenn með öðrum og betri hætti en launum án mótframlags.

Slíkt kallast ölmusa og víst að listamenn telja það varla mikinn heiður af að vera taldir ölmusuþegar.

 

24 njóti heiðurslauna listamanna

Athugasemdir

[Brynjar (IP-tala skráð) 12.12.2013 kl. 13:49]

Gunnar.  Við erum eflaust oft ósammála en þú kemur þó fram undir réttu nafni sem er gott.  Að kalla sjálfan sig nöldrara og nöldra svo er bara helvíti flott.  Ég ætla ekkert að segja neitt að svo stöddu um þau málefni sem þú nöldrar yfir eða gagnrýna þitt nöldur

[Gunnar Heiðarsson, 12.12.2013 kl. 13:52]

Takk Brynjar

[Kalli (IP-tala skráð) 12.12.2013 kl. 14:13]

Flott að sjá að einn efnaðist íslendingurinn, Guðbergur Bergsson, þurfi ekki að svelta í ellinni!