Hvers vegna....?

Á ferð okkar hjóna um okkar fagra land, í síðustu vuku, auðnaðist okkur sú gæfa að sjá Dettifoss, enn einu sinni. Ákveðið var að fara upp með Jökulsá að vestan. Vegurinn frá þjóðvegi við Ásbyrgi og suður að Dettifossi var vægast sagt skelfilegur, eitt þvottabretti alla leið, en um það ætla ég ekki að rita. Þegar hefur komið fram í fjölmiðlum hversu illa er staðið að viðhaldi malarvega að fjölsóttum ferðamannastöðum og verður að segjast eins og er að afsökun vegagerðarinnar um fjárskort er ansi þunn.

Það er aftur hinn nýji vegur frá Dettifossi að þjóðveginum á Mývatnsöræfum sem ég ætla að rita nokkur orð.

Þarna er kominn hinn besti vegur sem hugsast getur, upphækkaður, vel breiður og malbikaður. En af einhverjum óskiljanlegum ástæðum hefur verkfræðingum vegagerðarinnar þótt við hæfi að leggja þarna krókóttann veg.

Þar sem veginum var valinn staður eru tiltölulega sléttir melar með hraunflákum á milli. Engir hólar eða mýrarflákar sem krækja þarf fyrir og leikur einn að leggja beinann veg frá afleggjaranum að Dettifossi og allt suður að þjóðveginum á Mývatnsöræfum. Verkfræðingum vegagerðarinnar hefur þó þótt ástæða til að hafa um 30 beyjur á þessum stutta vegarkafla. Bein lína þarna á milli er um 17 km., en vegurinn sem lagður var er hins vegar 22 km. Vegurinn er því nærri 30% lengri en ástæða er til og miðað við það mannvirki sem þarna var byggt má gera ráð fyrir að sú aukalenging hafi kostað sitt.

Hvers vegna? Hvað rökstyður að leggja lengri veg en ástæða er til? Varla er um einhver umhverfissjónarmið að ræða, þar sem þarna er tekið mun meira land undir vegframkvæmdina en þarf og ekki verður þetta réttlætt með sparnaði.

Nú veit ég ekki hver kostnaður við hvern kílómeter í svona vegagerð kostar, en ljóst er að þeir fimm kílómetrar sem hefði mátt spara við þessa vegagerð hefðu vissulega komið sér vel í viðhaldi á veginum sem liggur svo áfram norður. Það hefði sennilega verið hægt að hafa veghefil í fullu starfi allt sumarið við að hefla hann.

Það með ólíkindum hvernig verkfræðingum vegagerðarinnar tekst aftur og aftur að klúðra málum svo illa. Það er engu líkara en þeir séu algerlega sjálfala í sínum verkum, að ekkert eftirlit sé með gerðum þeirra. Það er kannski ekki svo undarlegt að fjárskortur hái vegagerðinni, þegar svo er.