Kúguarstefna og siðleysi ESB er algjör

Enn á ný ákveða ráðamenn ESB að svíkja Grikki, nú á að halda eftir hluta þess láns sem þeim hafði verið lofað. Ástæðan er óvissa á pólitíska sviðinu í landinu!

Nú er það svo að Grikkir hafa ekki enn sagt upp þeim nauðarsamningum sem þeir voru látnir skrifa undir, eru ekki einu sinni búnir að mynda nýja ríkisstjórn! Lýðræðið hefur þó tjáð sig í Grikklandi og það er auðvitað ekki að skapi ráðamanna ESB, þeir vilja ekkert með lýðræði hafa!

Meðan þessum nauðarsamningi hefur ekki verið sagt upp, hlýtur hann að vera í gildi og því eiga báðir aðilar að standa við  hann. En það er ekki svo hjá ESB. Þar er einungis staðið við samninga eftir því sem ráðamönnum þóknast! 

Í dag, 10.maí, átti að greiða samkvæmt þessum samningi 5,2 milljarða evra til Grikklands. Ráðamenn ákveða að 4,2 milljarðar séu nóg, ákveða að halda einum eftir! Þetta er auðvitað kúgun og ekkert annað. Þarna er verið að segja Grikkjum að hlýða, að gera eins og ESB vill! Það er verið að segja Grikkjum að lýðræðið sé einskis virði!!

Þegar einhver tekur lán í banka getur bankastjórinn ekki upp á sitt einsdæmi ákveðið hvenær eða hvort greitt skuli eftir samningnum. Eftir undirritun er lántakandi handhafi fjárins samkvæmt ákvæðum skuldabréfsins en bankinn er handhafi bréfsins. Ekkert fær breytt ákvæðum þess nema um það náist samningur milli aðila. Þetta er hin eðlilega og siðferðislega rétta leið. En siðferði er eitthvað sem er óþekkt innan ESB, þar er afl hins stór gegn þeim minni sem ræður!!

Þetta sannar enn og aftur hversu rangt er að reyna samninga við ESB, sér í lagi ef um litla þjóð er að ræða. Það er í sjálfu sér ekkert vandamál fyrir sambandið að skrifa undir allskonar samninga, hvort þeir eru svo efndir fer algerlega eftir því hvernig skapi ráðamenn ESB eru hverju sinni og ef þeir sjá minnstu merki þess að lýðræði komi að málinu er næsta víst að samningurinn verði ekki efndur af þeirra hálfu!!

Grikkir hafa ekki enn myndað ríkisstjórn og óvíst hvort það takist. Afskipti ESB af þessum stjórnamyndunum eru þó grímulaus. Þau afskipti fara fram í gegnum fjármagnið, eins og reyndar allt er kemur að ESB. Þar er fjármagnið sem ræður og ekkert annað, enda þrífst ESB á harðasta kapítalisma sem þekkist í víðri veröld!!

En þessi afskipt gætu reynst ESB dýr. Ef ekki tekst að mynda ríkisstjórn á Grikklandi, mun verða kosið aftur. Þá er víst að kjósendur muni ekki taka því þegjandi að ESB skuli ekki standa við samninga, að ESB skuli vera með hótanir gegn þjóðinni, mitt í því ferli er verið er að reyna að mynda nýja ríkisstjórn. Það mun koma öfgaöflunum til góða og ekki víst að niðurstöður næstu kosninga verði betri, hvorki fyrir ESB né umheiminn!

Ráðamenn ESB verða að fara að opna augun, að öðrum kosti mun Evrópa loga í stríði áður en langt um líður. Þá hefur tilgangur með stofnun Stál og kolabandalagsins, sem síðar varð að EB og að lokum ESB, snúist upp í andhverfu sína!!