Sjaldan launar kálfurinn ofeldið

Við búum í réttarríki þar sem dómsvaldið hefur síðasta orðið þegar menn ganga á svig við þau lög sem sett hafa verið og ætlast er til að þegnarnir virði.

Þeir menn sem stóðu í brú bankanna og stæðstu fyrirtækja landsins, árin fyrir hrun, hafa sumir hverjir verið fundnir sekir fyrir dómi og dæmi um að sekt þeirra hafi verið metin svo mikil að ekki er til lagarammi fyrir nægjanlegri refsingu. Sumir þessara manna eru þegar komnir í afplánun á Kvíabryggju, opnu fangelsi. Hvort mönnum finnst það nægjanleg refsing, eða hvort heldur hefði átt að setja þá í lokað fangelsi, verður hver að dæma fyrir sig. Miðað við stærð þessara dóma er ljóst að opið fangelsi þykir vart þungur dómur, en þá kemur kannski eðli brotanna á móti. Sumum þykir það skipta miklu máli, sumum þykir minni sekt í því að ræna heila þjóð en að ræna búð.

Það er ekki nema rétt rúmlega áratugur síðan bera fór á því hér á landi að sumir menn væru að "efnast" langt umfram aðra og ekki fóru þeir leynt með það. Sumir skruppu í sjoppu á þyrlunni sinni og gátu síðan ekki borgað fyrir pulsuna, aðrir ferðuðust um heiminn á sínum einkaþotum og enn aðrir vildu eignast formúlu lið. Svo voru sumir sem létu sér nægja að kaupa bara lélegt breskt fótboltalið. Ofurlaun heyrðist oft sagt og víst var að sumum þeirra tókst að komast á laun sem voru svo svimandi há að útilokað var fyrir eðlilegt fólk að átta sig á þeim tölum. Jafnvel sáust mánaðarlaun sumra þeirra ná þeim hæðum að fyrir venjulegan launamann var útilokað að afla sömu launa, jafnvel þó unnið yrði nótt og dag samfellt í nokkur hundruð ár. "Þetta er vegna ábyrgðar og færni" var sagt. Um færnina þarf vart að fjölyrða, hún var engin og ekki fór heldur mikið fyrir þeirri ábyrgð sem þessi ofurlaun áttu að tákna.

Og nú eru sumir þessara manna farnir að taka út sína refsingu, reyndar við frekar refsilitlar aðstæður. Þegar skoðaður er kynningabæklingur Fangelsismálastofnunar yfir Kvíabryggju verður vart séð að þessir menn uppfylli þau skilyrði sem sett eru föngum þar vestra. Þar eru tiltekin nokkur atriði s.s. að ekki sé ætlast til að þar dvelji fangar lengur en tvö ár, að Kvíabryggja sé fyrir fanga sem eru að klára sína refsivist sem undirbúning undir að refsivist ljúki og að fangar þar vestra séu duglegir til vinnu og tilbúnir að taka þátt í störfum innan veggja fangelsisins.

Allir eru þessir menn með mun lengri dóma en tvö ár, enginn þeirra er að ljúka afplánun, flestir þeirra rétt að hefja hana. Um dugnaðinn veit ég ekkert, vel getur verið að þeir skúri þarna gólf og eldi mat.

Fyrir nokkrum árum var íbúðahúsið tekið undir fanga á Kvíabryggju, eða þegar forstöðumaður flutti af staðnum. Fram til þessa hafa fangar þurft að vinna sér rétt til að búa í húsinu, enda mun betri aðbúnaður þar en á almennu deildinni. Þar hafa menn meira frjálsræði, aðgang að interneti allan sólahringinn og eigið eldhús, svo eitthvað sé nefnt. Nú ber svo við að ekki er lengur nein keppni í dugnaði sem ræður hverjir búa í húsinu, nægir að hafa aðgang að fjármunum og það sem mestum. Því hafa þessir afbrotamenn sem sumir kalla "hvítflibba" fengið þetta hús til afnota.

Það er því enn verið að hampa þessum mönnum, jafnvel eftir að þungir dómar hafa fallið. Það er víst við hæfi að gera vel við þá menn settu þjóðina á hausinn og komu margri duglegri fjölskyldunni á kaldann klakann. Úr ótrúlegustu áttum heyrast þær raddir að þessir menn eigi bara alls ekki að sitja í fangelsi! Það er svo mikið "inn" í dag, peningarnir hafa ekki misst málið!

Og þrátt fyrir þetta allt, þrátt fyrir að þessum mönnum hafi verið sleppt lausum í fjárhirslur þjóðarinnar og fengið að leika þar lausum hala í nokkur ár og þrátt fyrir að þeir fái einstaka sérmeðferð innan veggja fangelsis, eftir að dómstólum skorti lagaheimild til að ákveða viðeigandi refsingu, þrátt fyrir þetta láta þessir menn eins og fífl og heimta enn meira.

Sjaldan launar kálfurinn ofeldið. Réttast væri að flytja þessa menn með hraði suður á Litla Hraun og taka af þeim öll hlunnindi. Það eru örugglega einhverjir fangar þar sem ættu frekar skilið að fá að búa á Kvíabryggju!

Fjölmiðlar að undirbúa fár

Athugasemdir

[Margrét (IP-tala skráð) 11.1.2016 kl. 17:22]

Það verður kanski næsta fréttnæma fréttin af þeim kumpánum á Kvíabryggju, þar sem þeir halda veislu fyrir elítuna með ostrum og kavíar í forrétt. Síðan verður dansað til miðnættis með aðkeyptri útlenskri frægðarhljómsveit. Er ekki 2007 góðærið að byrja á Íslandi í dag?????

[Þórður Sigfriðsson (IP-tala skráð) 11.1.2016 kl. 19:29]

Er það virkilega eðlileg leið í samskiptum forstöðumanns fangelsis og fanga innan fangelsis að notast við e-mail?
Eru allir fangar með aðgang að interneti?
Einnig er athyglsivert að hann vari fangann við að það verði fjölmiðlafár út af þessu.
Eru það virkilega eðlileg samskipti að fangelsisstjóri tali um að þeir muni koma illa úr þessu?
Er ekki verið að rannsaka lögreglumann fyrir svipuð samskipti?
Hver stjórnar þarna eiginlega, fangarnir eða fangelsisstjóri.

[Daníel Kristjánsson (IP-tala skráð) 11.1.2016 kl. 22:30]

Góður pistill Gunnar.

Langar að koma með annan vinkil á þessa frétt, hvað ef einhver hestabóndi á suðurlandinu tæki sig nú til og myndi bjóða föngum á Litla Hrauni upp á reiðnámskeið pro bono?

Gera eitthvað uppbyggilegt fyrir þá sem sitja þarna inni og hafa jafnvel aldrei setið hest eða komið nálægt sveit?

Bara pæling, þykir þetta vera góð hugmynd til að koma einhverju viti fyrir þá sem hafa jafnvel aldrei tekið þátt í venjulegu samfélagi. Það er auðvitað allt annar hlutur þegar lúxusfangar Kvíabryggju eiga í hlut en ætti samt ekki að slá hugmyndina út af borðinu vegna þess.

[Helga Kristjánsdóttir, 12.1.2016 kl. 01:53]

Þeir giftu hafa afnot af samfarasvítu,að minnsta kosti sá sem fyrirkom ungum bróður tengdadóttur minnar.Hann tók bara helming refsivistarinnar út.- á þeim tíma sem ég sá kvöl foreldra og aðstanenda fórnarlambsins,sem var um jól,rúmum mánuði eftir glæpinn, grasseraði heiftin út í hann.En þá er það sem góðir prestar eru guðs ígildi.     

[Gunnar Heiðarsson, 12.1.2016 kl. 07:59]

Það kæmi ekki á óvart, Margrét.

Margar góðar spurningar, Þórður.

Þessi hugmynd er góð, Daníel, það er að segja ef hún er pro bono. Það var bara alls ekki þannig sem námskeiðið á Kvíabryggju átti að vera, þvert á móti átti kostnaðurinn að vera mjög hár fyrir hvern "nemanda" á því, svo hár að öruggt væri að einhverjir "meðalmenn" væru útilokaðir frá kunningsskapnum.

Sorgleg saga, Helga. Aðbúnaðurinn á nýja lúxushótelinu á Hólmsheiði verður enn betri fyrir fangana og spurning hvort hægt verði að tala um refsivist þegar það verður tekið í notkun.

[Margret S (IP-tala skráð) 12.1.2016 kl. 15:53]

Já, fangelsið á Hólmsheiði. Það verður miklu flottara og betri aðstaða en margir leigjendur búa við. Okurleiga í kjallaraholum og súðargeymslum sem búið er að breyta í herbergi er veruleiki alltof margra. Einnig ættu fangar að prófa að búa við þá þjónustu og fæðu sem sumt gamalt fólk fær í dag. Þeir myndu fljótlega garga "mannréttindabrot".