Það hækkar lítið í buddunni ef engin innkoma er

Það er sama hversu stór buddan er, ef innkoma er engin er hún alltaf jafn tóm.

OR hélt fund á Akranesi um þann vanda sem bæjarbúar standa frammi fyrir, öryggisleysi í afhendingu á heitu vatni til húshitunnar. Á þessum fundi kom fram að OR ætlar að byggja stærri miðlunartank við Akranes og telja þeir það muni leysa þennan vanda. En vandinn liggur ekki í miðlunartanknum, nema að svo litlu leyti. Tankurinn er í góður þó hann sé kannski í minna lagi. En það er ekki vandamál í sjálfu sér.

Vandinn liggur fyrst og fremst í ónýtri hitaveitulögn til bæjarins. Þessi lögn sem var lögð fyrir 33 árum var lögð úr asbeströrum og líftími hennar talinn verða um 10 ár. Þeir bjarsýnustu töluðu þó um að hún gæti endst í 20 ár.

Það er því efni lagnarinnar og aldur sem er vandamál. Nú þegar hafa verið endurnýjaðir um 17 km af lögninni í varanlegt efni, en eftir að skipta út 43 km. Ekki veit ég hvað kostar að byggja 6000 rúmmetra miðlunartank, með tilheyrandi búnaði svo hann verði nothæfur. En alveg er víst að því fé væri betur varið til endurnýjunnar þess hluta lagnarinnar sem er verst farinn.

OR ætlar að byggja þennan tank á næsta ári, en ekkert á að gera í endurnýjun lagnarinnar fyrr en árið 2015 og þá einungis lítilsháttar endurnýjum. Það verður ekki fyrr en árið 2019 sem ætlað er að hefja markvissa endurnýjun lagnarinnar og það verk á að taka átta ár. Því mun síðasti hluti asbestlagnarinnar verða orðinn 46 ára þegar honum verður skipt út!

OR ætlar að leysa vandamálið með því að leysa þann vanda sem það skapar, í stað þes að leysa sjálfann vandann. En það er lítið gagn af stórum miðlunartönkum ef ekkert vatn berst til þeirra. Miðað við veður eins og var síðast þegar lögnin gaf sig endist núverandi miðlunartankur í átta klukkustundir. Með tilkomu þess tanks sem OR boðar mun miðlunartíminn lengjast um einn sólahring, miðað við sama veðurfar og að báðir tankar séu fullir. Vegna lélegs ástands lagnarinnar tekur langann tíma að fylla þann tank sem fyrir er, þar sem notkun er orðin meiri og lögnin svo léleg að ekki er hægt að bæta það upp með auknum þrýsting, þó allur búnaður við lögnina til þess sé fyrir hendi. 

Fram kom á þessum fundi að bilanir hafi aukist síðustu ár, eðlilega eftir því sem lögnin eldist. Það er ekki spurning hvort heldur hvenær stór bilum kemur upp.  Vinna við slíka viðgerð gæti tekið einhverja daga. Þá skiptir litlu máli hvort frysta fer í lögnum húsa einum sólahringnum fyrr eða síðar. Það mun svo taka marga daga að fylla aftur miðlunartankanna og ekkert öryggi af þeim á meðan.

Þá nefndi Bjarni litli Bjarnason að skoða þurfi orkuvinnslu nær Akranesi og nefndi hitaveituna á Leirá og járnblendiverksmiðjuna á Grundartanga. Þessir kostir eru dýrir og að auki í einkaeigu. En vandinn er ekki lítið vatn. Það er nægt vatn í Deildartungu, en vegna lélegrar lagnar er ekki hægt að auka þrýsting og rennsli á henni. Aftur komum við að sama vanda, lögninni sjálfri.

Bjarni litli ætti að skoða þetta mál betur. Ég veit að hann veit að lítið gagn er af stóru íláti ef ekkert rennur í það. Því hlýtur að vera forgangsverkefni að tryggja fyrst lögnina og rennsli að þessum tank, áður en hann er byggður.

Það eru mikil vonbrigði fyrir Skagamenn hversu léttvægt OR tekur á þessu óöryggi. Við Skagamenn borgum sama gjald fyrir heita vatnið og viðskiptavinir  fyrirtækisins á höfuðborgarsvæðinu. Það er klárt mál að OR kæmist ekki upp með svona sleifarlag ef um væri að ræða slíkt óöryggi í afhendingu á heitu vatni sunnan Hvalfjarðar!

Þá hefur sjaldan verið talið vænlegt til árangurs að reyna að lækna afleiðingar sjúkdóms en leifa honum sjálfum að krauma áfram. 

 

Athugasemdir

[Jóhannes Laxdal Baldvinsson, 13.12.2013 kl. 19:07]

Ég segi nú bara hvað voruð þið að hugsa að selja hitaveituna frá ykkur?  Og af hverju eruð þið ekki að vinna í því að kaupa hana aftur?

[Gunnar Heiðarsson, 14.12.2013 kl. 07:19]

Stór spurning Jóhannes.

Dettur hellst í hug að þetta hafi verið gert í ölæði, a.m.k. fengum við íbúar lítið um þetta að segja.

Það er hægara í að komast en úr að fara.

[Hörður Harðarson (IP-tala skráð) 14.12.2013 kl. 14:49]

Sæll Gunnar

Ég reyni að lesa nöldrið  þitt reglulega og er í 99% tilvika 99% sammála því sem þú skrifað og hef dáðst af pennafærni þinni þó svo að ég hafi ekki  „kommentað“ á þig fyrir það enda hef ég haft það fyrir reglu að tjá mig sem minnst á netinu, en nú ætla ég að brjóta regluna.

Ég fór á þennan fund kannski bara vegna þess að ég er starfsmaður Orkuveitunar og þar af leiðandi málið skilt og svo er ég náttúrulega almennur heitavatnsnotandi líka. Mér fannst nú ekkert sérlega vel mætt á þenna fund en að vísu er ég ekki vanur að fara á svona fundi þannig að ég get ekki dæmt um það. Ég minnist þess nú ekki að hafa séð þig á fundinum en það er ekki að marka.

Þetta var góður fundur og skilmerkilega skýrt frá áætlunum OR varðandi endurnýjun veitunar.

Það kom fram að nýr tankur kostar  300 milljónir, það sem eftir á að endurnýja kostar 5000 milljónir.

Þar kom líka fram að bilanir á lögninni hafa verið um 35 á ári að meðaltali frá upphafi og hafi ekkert aukist síðustu ár en það hefur farið að bila á öðrum svæðum augljóslega þvi bilanamestu kaflarnir hafa smátt og smátt verið settir í stál.

Persónulega finnst mér þetta vera hárétt ákvörðun til að auka afhendingaröryggi á heitu vatni til Akurnesinga, að flýta smíði tanksins frá 2017 til 2014 dáist að því hversu hratt og örugglega sú ákvörðun var tekin.

Þú minnist á „stóru“ bilunina, það er vitað að það sem aldrei hefur gerst, getur alltaf gerst vonandi sleppum við við svoleiðis hamfarir en við venjulegar og þekktar aðstæður er þetta frábær lausn.

Þú talar um Bjarna litla, Bjarni er kannski ekki hávaxinn enda skiptir það engu máli en í mínum huga er hann lang stærsti  forstjórinn sem hefur stýrt OR.