Þarfnast ferðaþjónustan undanþága frá utanvegaakstri

Margt slæmt er hægt að segja um vinnubrögð Vegagerðarinnar og mörg dæmi hægt að nefna um rangar ákvarðanir og fáviskuleg verkefni. En að ætlast til þess að Vegagerðin geti ráðið snjóalögum, er full langt gengið.

Lokanir fjallvega byggjast á ákveðnum atriðum. Samkvæmt viðtali við Sæmund Þór Sigurðsson, eiganda Geo Travel, eru öll þau atriði við lýði á veginum inn að Öskju. Vegurinn er illfær nema vel búnum jeppum, vatn rennur eftir honum og snjór er yfir honum að hluta. Það er því ljóst að lokun Vegagerðarinnar á fullan rétt á sér.

Til að opnun geti átt sér stað verður allur snjór að vera farinn af veginum, vatn hætt að renna eftir honum og vegagerðin búin að fara með sín tól og tæki og laga það sem laga þarf. Enn virðist vera langt í það á veginum inn að Öskju, samkvæmt orðum Sæmundar.

Hugmyndir hans um að veginum skuli ekki lokað, heldur aðvörun sett á hann, er í besta falli barnaleg. Það mun einungis skapa glundroða og hættu. Annað hvort eru þessir fjallvegir opnir eða lokaðir, það er ekki til neitt millbil þar á.

Það er hugsanaháttur manna eins og Sæmundar Þórs sem valda því að fjallvegir hér á landi eru oft á tíðum verri en þarf. Þeir telja sig mega gera allt sem þeim dettur í hug, þegar þeim dettur í hug og skeita ekkert um aðra. Áður fyrr var þessi hugsanaháttur réttlættur með því stórum og öflugum bílum. Þegar þau rök hættu að virka, var ferðaþjónustan tekin í gagnið sem rök fyrir slíkum yfirgangi.

Við snjóalög getur enginn ráðið. Þar er náttúran að verki og henni verðum við að hlýða. Því verða ferðaþjónustufyrirtæki einfaldlega að auglýsa sínar ferðir samkvæmt því. Ferðir með túrista um fjallvegi landsins geta ekki hafist fyrr en vegirnir hafa verið opnaðir. Svo einfalt er það.

En talandi um fjallvegi okkar. Fyrir okkur Íslendinga, sem viljum ferðast um þessa vegi að sumri til, á óbreyttum jeppum, er það nánast orðið útiokað. Umferð stórra rútubifreiða og öflugra trukka er orðin svo skelfileg um þessa vegi að útilokað er fyrir Vegagerðina að halda þeim við. Ef þurrt er í veðri rýkur allt fínefni úr vegunum og eftir stendur stórgrýti og þegar bleytutíð er þá skera þessir bílar vegina í sundur. Hraði þessara bíla er með ólíkindum og vandséð hvaða ánægju erlent ferðafólk hefur af slíkum rússíbanaferðum.

Sjálfur hef ég stundað sumarferðir um hálendi okkar í rúm 30 ár og breytingin sem hefur orðið á þeim tíma gífurleg, sérstaklega síðustu fimm til tíu ár. Áður var fátítt að mæta rútu eða risatrukk á þessum leiðum, en nú er fjöldi þessara bíla orðinn órtúlegur.

Síðasta sumar fór ég m.a. frá Ásbyrgi suður að Dettifoss, að vestanverðu við Jökulsá á Fjöllum. Þegar ég kom inná veginn hjá Ásbyrgi leyst mér ekki á blikuna, vegurinn var vægast sagt skelfilegur. Allt fínefni rokið úr honum og vegurinn orðinn eitt alsherjar stórgrýtt þvottabretti. Við ákváðum að halda áfram, í þeirri trú að þetta næði einungis inn að Jökulsárgljúfrum, að vegurinn þaðan og suður að Dettifoss væri skárri, þar væri minni umferð stórra rútna. Á þessari stuttu leið inn að Jökulsárgljúfrum mættum við fjölda rútubíla, auk þess sem ótrúlega margar rútur tóku fram úr okkur. Ekki var mikið hægt að sjá í kringum sig vegna vegryks sem þessir bílar ollu, enda hraði þeirra ótrúlegur. Eftir stopp í Jökusárgljúfrum var haldið áfram suður á bóginn, í von um skemmtilega ferð að Dettifossi. En vegurinn lagaðist lítið og umferðin var sú sama og vegrykið ætlaði allt að kæfa.

Mikil gagnrýni kom á Vegagerðina, af hálfu ferðaþjónustuaðila, einmitt um þennan veg, á svipuðum tíma og við vorum þar á ferð. Vegagerðin var talin standa sig ill í viðhaldi þessa vegar.

Fyrir það fyrsta er þessi vegur skilgreindur sem fjallvegur og viðhald hans því mun minna en annara vega. Í öðru lagi er útilokað að viðhalda vegi sem þessum, þegar umferð er með þeim hætti sem þarna er, þungir bílar í þúsundatali og hraði þeirra svo mikill að stór hætta stafar af.

Það er orðið svo að við Íslendingar getum ekki lengur ferðast um þessa vegi, með góðu móti og erlendir ferðamenn hljóta að fara að forðast þá einnig. Það er varla mikið gaman af því að hendast um þessa vegi í skröltandi rútu og sjá ekkert nema vegaryk.

Ferðaþjónustan verður að fara að hugsa sinn gang. Ekki er þó að sjá að vilji sé til þess, þegar menn eins og Sæmundur Þór telja að lög og reglur skuli beygja fyrir ferðaþjónustuna.

Það er ekki undanþága frá lögum sem ferðaþjónustan þarf, heldur öflugri lagasetning og meira eftirfylgni með því að lögum sé framfylgt.

Ég trúi því ekki að óreyndu, að sýslumaðurinn á Húsavík grípi ekki til viðeigandi ráðstafana gegn Sæmundi Þór, nú þegar hann sjálfur hefur viðurkennt, í fjölmiðlum, að hafa ekið eftir lokuðum fjallvegi og þá í raun stundað utanvegaakstur og það með ferðamenn!!

 

Vinnubrögð Vegagerðar „óásættanleg“

Athugasemdir

[Sigurður Sunnanvindur (IP-tala skráð) 16.6.2013 kl. 20:40]

Þú virðist hafa misst af kjarna málins.

Vegagerðin hefur bannað umferð um veginn en ferðaþjónustan og almennir Íslenskir ferðamenn vilja að vegurinn sé merktur "Ófær" eins og hefð er fyrir með sunnanverðan Kjalveg. Með því móti er opnað fyrir bíla sem ekki skemma veg og geta ekið rakleiðis yfir skaflana.

-Og það er ekkert vatnsrennsli um veginn uppí öskju.

[Gunnar Heiðarsson, 16.6.2013 kl. 20:58]

Sæll Sunnanvindur.

Þessi hugmynd að mekja veginn ófærann en hafa samt opinn er barnaleg. Það er vitað að hver bílstjóri telur sig bestann, jafnvel þó bíllinn sé allsóhæfur til ferðalaga á slíkum vegum og ljóst að margur mun leggja í hann, festa sig og valda spjöllum.

Til að komast upp á skaflanna þarf að aka eftir blautum og viðkvæmum veginum og það skaðar þá, sama hversu oflugur trukkurinn er.

Meginmálið er þó að meðan vegur er lokaður telst umferð um hann utanvegaakstur. Um akstur utanvega eru skýr lög og þar kemur m.a. fram heimild til aksturs ofaná snjó. Um þann akstur eru strangar regur um t.d. snjóþykkt.

Þeir sem þekkja klakaslit þurfa ekkert að efast um ákvörðun lokunnar Vegagerðarinnar.

Varðandi vatnsrennsli á veginum inn í Öskju, hef ég eingöngu orð Sæmundar fyrir mér, í viðhengdri frétt, en þar segir hann að vatn renni eftir veginum.

Ef ekki á að skapa hér enn frekari glundroða í ástandi fjallavega, verður Vegagerðin að fá þann tíma sem hún telur þurfa til að opna þessa vegi.

Ég er enginn sérstakur áhangandi Vegagerðarinnar, þvert á móti hef ég gagnrýnt fjölda verka hennar. En gagnrýni verður að byggjast á einhverjum raunveruleik, ekki draumórum.

Og eitt er víst; við búum á Íslandi og verðum að haga okkur eftir duttlungum náttúrunnar. Hjá því kemst enginn, jafnvel þó hann sé á öflugum jeppa á stórum dekkjum!

[ragnar (IP-tala skráð) 16.6.2013 kl. 23:10]

er rukkað ferðaþjónustufyrirtækji um aðgang að þessum náttúrusvæðum ?

ef ekki þá er það mesta heimska sem um getur i öllum þessum umræðum um t.d skemda vegi og aðgangsgjald að landinu, þetta er atvinnugrein sem veldur náttúru og eignaspjöllum. og þarf að skattlegja sérstaklega gegn því og þau rukka þá bara meira af ferða mönnunum ef þau ættla að væla yfir því.