Flatskjáir og bankahrun

Það voru fræg orðin sem einn af eigendum gömlu einkabankanna lét falla, skömmu eftir að banki hans hafði farið í þrot, þegar hann hélt því fram að landsmenn allir væri sekir og benti á alla flatskjánna sem fólk hefði sóað fé í.

Ljóst er að einhverjir landsmenn eru ekki alveg saklausir af þeirri firringu sem hér viðgekkst á síðustu árunum fyrir hrun, en þá má ekki gleyma þeim látlausa áróðri sem bankarnir héldu uppi, til að krækja sér í lánþega. Boðnir voru gull og grænir skógar og því blákallt haldið fram við fólk að áhættan af lántökum væri engin. Sumir féllu fyrir fagurgalanum.

En stæðsti hluti landsmanna er þó ekki þessu marki brent. Það sýndi forsjá og fór varlega. Fjöldi fólks skuldaði ekki nema hlut í fasteignum sínum, safnaði sér á séreignareikning og lagði fé til hliðar, til að geta leyft sér smá munað. Fór kannski til útlanda eða endurnýjaði bílinn sinn, þegar innistæðan leifði. Þetta fólk passaði þó að öll slík fjárútlát rúmuðust innan þess sem safnað hafði verið. En það var með fasteignalán, flest verðtryggð lán.

Þegar svo bankarnir hrundu varð alger forsendubrestur hjá þessu fólki. Lánin hækkuðu hratt og fasteignin lækkaði í verði. Til að standa við sínar skuldbindingar byrjaði það að tæma sínar bankabækur og síðan var gengið á séreignasparnaðinn, þá aura sem átti að nota til að eiga þægilegra ævikvöld. En allt kom fyrir ekki. Bankinn eignaðist sífellt stærri hlut í fasteigninni meðan afborgunin hækkaði. Nú stendur þetta fólk frammi fyrir þeirri staðreynd að ná vart endum saman og við hver mánaðamót þarf að setjast niður til að reyna að skipuleggja hvernig lifað verður til næstu mánaðamóta. Getan til að takast á við óvænt útgjöld er engin og því þakkað fyrir hvern dag sem enginn slasast eða veikist á heimilinu.

Þessi barátta er orðin nánast vonlaus. Ekkert ljós framundan. Fólk hefur fyrir löngu áttað sig á að enginn vilji er hjá núverandi stjórnvöldum til hjálpar. Á þeim bæ er fyrst og fremst hugsað um að halda fjármagnseigendum rólegum. Því er nú beðið næstu kosninga, beðið eftir fyrstu viðbrögðum næstu ríkisstjórnar. Þar mun skera á milli feigs og ófeigs þjóðarinnar. Finni fólk að sama viðhorf muni ríkja og hingað til, er hætt á að margir einfaldlega gefist upp og hætti að greiða af þessum lánum. Það jafngildir gjaldþroti þjóðarinnar!

Það er nefnilega ekki lengur spurning um hvort eitthvað eigi að gera, heldur hvað. Dýrasta lausnin er að gera ekki neitt og ódýrast að stíga skrefið til fulls. Að leiðrétta lán og afnema verðtryggingu.

"Ekki gera ekki neitt" auglýsir ein innheimtustofnunin grimmt. Það eru mikil sannindi í þessu, vandinn eykst við hvern dag sem ekki er tekið á honum. Ef önnur þeirra leiða sem bennt var á fyrst eftir hrun hefði verið valin þá, lækkun lána eða afnám verðtryggingar, hefði sú lausn dugað flestöllum lánþegum. Nú er óvíst að þó báðar þessar leiðir verði farnar, að það dugi. A.m.k. hafa einhverjir þegar misst sitt heimili að ósekju, einungis vegna ráðaleysis og aðgerðaleysis stjórnvalda.

Ég neita að viðurkenna að flatskjárinn sem ég keypti árið 2007 og greiddi með sparifé mínu, réttlæti það að bankinn skuli hafa eignast sem svarar 8 milljónum af minni eign og ég neita að viðurkenna að flatskjárinn sem ég keypti 2007 og greiddi með sparifé mínu, geti réttlætt það að nú þurfi ég að sjá af nærri helmimingi hærri upphæð við hver mánaðarmót til þess sama banka,  til þess eins að bankinn viðurkenni að ég standi í skilum!!

Fjöldi fjölskyldna landsins er í svipuðum sporum, sennilega flestar.

 

Verðtrygging neytendalána afnumin

Athugasemdir

[Sleggjan og Hvellurinn, 10.2.2013 kl. 13:36]

Þú talar um þinn banka sem "óvart" lániði þér fyrir flatskjá. (neyddi einhver þig um að taka flatskjá lán?)

En það er óþarfi að tala um bankana "vondu bankana"

Íbúðarlánasjóður vour stærstir á þessum markaði.

Hann á 100% ábyrgð ríkissjóðs. Tap íls er tap okkar allra.

En ég spyr bara. Hvar eiga peningarnir að koma?

http://www.visir.is/ibudalanasjod-vantar-12-milljarda-krona/article/2012121129427

[Gunnar Heiðarsson, 10.2.2013 kl. 14:26]

S&H, hvernig væri nú að taka upp gleraugun áður er rokið er á lyklaborðið!

Lestu skrif mín aftur, þar kemur skýrt fram að ég tók EKKI lán fyrir flatskjá og ég tók EKKI lán til að ferðast eða endurnýja bílinn!!

Það er lágmark að þú lesir fyrst áður en gagnrýnt er!!

Og til að upplýsa þig um hvaðan peningarnir áttu að koma, þá mannstu kannski að nýju bankarnir fengu lánasöfnin með afslætti. Þeir hins vegar færa þau inn á fullu verði í sínar bækur og er það uppustaðan í svokölluðum "hagnaði" þeirra frá hruni.

Þegar lánasöfnin færðust á milli banka, átti þessi afsláttur að sjálfsögðu að koma að a.m.k. hluta til lánþegana.

Hvernig má það vera að fyrirtæki sem borgar ákveðna upphæð fyrir eitthvað, í þessu tilfelli nýju bankarnir fyrir lánasöfnin, geti síðan rukkað um nærri helmingi hærri upphæð fyrir þann hlut?

[Guðmundur Ásgeirsson, 10.2.2013 kl. 16:17]

Á dögunum fannst flatskjárinn sem hrundi liggjandi á gólfinu í seðlabankanum. Ég er ekki að skálda þetta, við vorum í heimsókn í seðlabankanum og þar hafði einn af upplýsingaskjáum myntsafnsins losnað úr veggfestingum og lá þar á hvolfi á gólfinu. Það voru að sjálfsögðu teknar myndir af undrinu.

[Seiken (IP-tala skráð) 10.2.2013 kl. 21:47]

Sleggjan og Hvellurinn.

Þið félagarnir hafið verið duglegir við að tala niður allar hugmyndir sem koma fram til lausnar á skuldamálunum. En það væri þá miklu nær að þið mynduð svara spurningunni í stað þess að beina henni til Gunnars.

Hvaðan eiga peningarnir til að bjarga ÍBLS að koma? Það vantar ennþá ca. 100-150 milljarða inn í sjóðinn þrátt fyrir síðustu innspýtingu.

[Sleggjan og Hvellurinn, 11.2.2013 kl. 11:16]

Já ég er sammála þessari spurningu Seiken. Hvar eiga peningarnri í ÍLS að koma?

Ég get í rauninni svarað því. Með hærri sköttum og meiri niðurskurði. Ekki flókið.

Og heimsulegu fabúleringar Gunnars opinberar fáfræði þessa drengs. Rétt er að lánasöfn bankana fékkst með afslætti. Ég nenni ekki að fara dýpra í það einsog er.

En til upplýsingar fyrir Gunnar þá er ÍLS stærstil lánveitandi íbúðarlána á Íslandi. Þar fór ekkert á hausinn. Þar voru engin lán sem fengust á afslætti. Þvert á móti kostar þetta skattborgara milljarða á ári... og vitleysingar einsog Gunnar vilja afskrifa meira og auka kostnaðinn enn frekar.