A1 besti kosturinn

Það er með ólíkindum að vegagerðin skuli ekki ætla að skoða leið A1, veg út Þorskafjörðinn að sunnanverðu út á Reykjanesið og þaðan beint yfir á Skálanes, með sjávarfallavirkjun.

Vissulega er mörgum spurningum ósvarað varðandi þessa leið, en svör fást þó ekki nema þessi möguleiki sé skoðaður. Því á hann vissulega erindi inn á mat á umhverfisáhrifum, samhliða frekari rannsóknum á hagkvæmni.

Er hugsanlegt að ástæður vegagerðarinnar fyrir þessu fálæti sé vegna þess smákóngahugsanaháttar sem oft ræður ríkum innan fyrirtækja og stofnanna ríkisins, að forsvarsmenn vegagerðarinnar geti ekki hugsað sér að þurfa að vinna með einhverjum öðrum? Þetta er vissulega áleitin spurning.

Leið D1, sem vegagerðin horfir mest til er sísti kosturinn. Þó farið verði undir Hjallaháls með jarðgöngum, er Ódrjúgshálsinn eftir. Hann getur oft verið erfiður á vetrum. Þegar hægt er að leggja veg á láglendi og kostirnir fleiri enn einn til þess, á að kasta öllum hugmyndum um veg upp á fjall til hliðar. Það á ekki að líta til slíkra kosta nema allt annað sé ófært með öllu.

Leið H er þá heldur skárri, en enn er verið að tala um jarðgöng. Þau kosta mikið auk þess sem ekki er séð að vilji sé til að fara í slíka framkvæmd á næstunni. Jarðgöng eiga ekki að þekkjast nema um verulega styttingu sé að ræða eða ekki um aðrar leiðir að velja. Hvorugt á við í þessu tilfelli.

Leið I, út Þorskafjörð að sunnanverðu með brúm yfir Þorskafjörð, Djúpafjörð og Gufufjörð er álíka mikil stytting og leið H, en er án jarðgangna og á láglendi alla leið.

Leið B er ekki inn í dæminu, einhverra hluta vegna. Þar virðist sem sjónarmið eða hagsmunir einhverra fárra einstaklinga hafi náð völdum og að ekki sé hægt að hreyfa við því. Auðvtað á sú leið þó að vera með í matinu, þó ekki sé nema til samanburðar við aðra kosti.

Fyrir þann sem hefur engra eða mjög lítlla hagsmuna að gæta, bæði ferðalega séð og ekki síst valdlega, virðist liggja beint við að leið A1 sé besti kosturinn, a.m.k. til lengri tíma litið. Þar yrði mesta stytting vegarins og öll leiðin á láglendi. Að ekki sé talað um ábatann af virkjuninni.

Næst besti kosturinn væri svo leiðir B og I. Um leið B þýðir víst ekki að ræða svo leið I kæmi því næst.

Leiðum H og D1 á að kasta fyrir róða og ekki hugsa um þá kosti neitt frekar. Sérstaklega ekki leið D1.

 

 

B-leið verði skoðuð að nýju