Eðlisbreyting á aðildarviðræðum, í trássi við samþykt Alþingis !!

Árni Þór Sigurðsson, formaður utanríkismálanefndar segir að samningsafstaðan liggi í raun fyrir og Árni Páll Árnason, sitjandi formaður sömu nefndar segir það sama. Því er ljóst að samningsafstaðan liggur fyrir, einungis eftir að láta þá aðila sem semja áttu þetta markmið, samþykkja það.

Reyndar kom Árni Páll með nýjann vinkil á vald samninganefndarinnar í síðdegisþætti fréttastofu RUV í dag. Þar staðfesti hann að valdið liggur hjá samninganefndinni, en utanríkismálanefnd og væntanlega Alþingi, einungis afgreiðslustofnanir samninganefndarinnar.

Hann fullyrti að ekkert óeðlilegt væri þó samningsafstaðan lægi fyrir þó utanríkismálanefnd hefði ekki séð hana. Taldi þetta eðlilegt, þar sem samninganefndin mótaði samningsmarkmið í hverju tilfelli fyrir sig og nefndir Alþingis ættu síðan að samþykkja þá afsöðu. Eitthvað er lýðræðið og þingræðið farið að blikna hjá Árna Pál, sennilega dvalið nokkrum dögum eða vikum of lengi í Brussel.

Það er ekkert í samþykktum Alþingis frá sumrinu 2009, sem segir að samninganefnd Íslands í ESB viðræðum, fái þetta vald, þvert á móti er skýrt tekið fram að nefndir Alþingis og Alþingi sjálft, skuli vera leiðandi í öllu er snýr að markmiðum Íslands, enda eina stofnunin sem slíkt vald hefur. Þessa vinnu átti að vinna með hagsmunaaðilum hverju sinni!

En Árni Páll lítur þetta öðrum augum og greinilega utanríkisráðherra einnig. Að minnsta kosti hefur freklega verið gengið framhjá utanríkismálanefnd í þessu máli. Kannski var það einmitt þetta sem Össur átti við, þegar hann á fréttamannafundi erlendis, skömmu eftir að aðlögunarferlið hófst, sagði að meta þyrfti hverju sinni hversu langt væri hægt að ganga gegn samþykkt Alþingis í þessum viðræðum. Það er ljóst að hann hefur gengið nokkuð of langt núna!

Það var annars merkilegt þetta viðtal við Árna Pál í síðdegisþætti fréttastofu RUV. Þar fékk hann að blaðra um ágæti evrunnar og hversu sterk hún væri og hversu miklu sterkari hún yrði að lokinni endurskipulagningar evruríkja. Hann taldi það hið besta mál að afsala sjálfstæði þjóðarinnar til Brussel, það væru nú ekki svo beisnir bógar hér á landi til að stýra slíkum málum. Sennilega hefur hann verið að tala um sjálfann sig!!

Einkennilegast var þó þegar hann fullyrti að ESB væri að færa styrkjakerfi sitt í sjávarútvegi til þess sem tíðkaðist hér á landi. Það er ekkert styrkjakerfi til sjávarútvegs hér á landi, þvert á móti er sjávarútvegur einn af hornsteinum okkar og heldur uppi þjóðfélaginu. Í ESB er þessu öfugt farið, sjávarútveginum er haldið þar á floti með styrkjum. Það má frekar segja að ríkisstjórnin Íslands sé að færa íslenskann sjávarútveg til þess horfs sem ríkir í ESB, sé að gera hann að styrkþega þjóðarinnar í stað gullkistu hennar.

Þá staðfesti hann hug aðildarsinna, að allt yrði gert til að Ísland gæti orðið aðili að ESB, að ekkert gæti komið í veg fyrir það. Að ekkert líf væri í raun til utan ESB!! Sjálfstæði, yfirráðaréttur yfir hafsvæðum umhverfis Ísland og sjálfræði yfir auðlindum landsins væri vel fórnandi til að ná settu markmiði, enda einungis afdalabúar sem ekkert kynnu sem landið byggi. Við yrðum að fá leiðsögn frá hinu dásamlega ESB. Árni Páll þarf greinilega að endurnýja lesgleraugu sín, hann virðist ekki hafa lesið fréttir síðustu tvö ár, a.m.k.. Ef svo væri talaði maðurinn ekki svona, þá sæi hann bjarmann af eldunum sem loga um alla Evrópu!!

Sú grundvallarbreyting sem opinberast hefur nú, um eðli aðildarviðræðna, er svo mikil breyting frá því sem sagt hefur verið hingað til, er svo mikil breyting frá samþykktum Alþingis frá sumrinu 2009, að þeir þingmenn sem hafa kjark og þor hljóta nú að stíga á bremsuna. Það hlýtur að vera að Alþingi setji ofaní við Össur Skarphéðinsson og stöðvi þetta ferli sem hann hefur hafið, í trássi við Alþingi. 

Hvað segir Ögmundur nú? 

 

Liggur samningsafstaðan fyrir?