Kjósum strax !

Ekki ætla ég að skrifa um aðferðarfræði Fréttablaðsins, aðrir hafa gert því efni góð skil.

Það sem ég ætla að segja er einungis þetta:

Kjósum strax um áframhaldandi aðildarviðræður. Samkvæmt þessari könnun vilja 65% kosningabærra Íslendinga að ferlinu verði haldið áfram. Því ættu aðildarsinnar ekkert að óttast.

Með því að kjósa um áframhald viðræðna er hægt að fá úr því skorið hvort halda beri áfram viðræðum. Verði niðurstaðan sú sem Fréttablaðið heldur fram er öllum vopnum slegið úr höndum okkar, sem erum á móti aðild.

Að þessi krafa hafi ekki komið fram frá neinum þeirra sem mæra ESB er í raun undarlegt. Nú hafa tvær kannanir með sömu aðferðafræðinni verið gerðar af hálfu Fréttablaðsins og niðurstaðan nánast samhljóma. Því hefði maður ætlað að aðildarsinnar væru mjög áfram um að kjósa um framhaldið og ná þannig nánast fullum sigri.

Ríkisstjórnin, sem dregur þessa umsókn áfram eftir skítnum, ætti einnig að vera áköf um slíka kosningu. Með því gætu stjórnvöld róað almennig og þá ólgu sem meðal hans er, vegna þessa máls. Með því gætu stjórnvöld skapað frið og farið að vinna að uppbyggingu.

Einhverra hluta vegna verða aðildarsinnar og forusta stjórnvalda þó æst og vilja ekki heyra minnst á kosningu. Við hvað eru þau hrædd? Vita þau kannski það sama og við hin, að könnun Fréttablaðsins er byggð upp á svindli og að fylgið við áframhald viðræðna er ekki svona mikið?

Vita stjórnvöld og aðildarsinnar að fylgið við áframhald viðræðna er mun minna en 50% og vilja þess vegna ekki láta kjósa um það?

Aðildarsinnar hafa verið duglegir að halda því fram að með því að fresta viðræðum sé verið að taka lýðræðið af þjóðinni. Þetta er málflutningur sem er þeim til skammar, þar sem umsóknin var send til ESB án þess að þjóðin fengi neitt um það að segja. Ef lýðræðisást aðildarsinna er svo mikil sem þeir nú láta, hefðu þeir ekki komið í veg fyrir samþykki þeirrar tillögu sem lögð var fyrir Alþingi vorið 2009, um að þjóðin fengi að eiga síðasta orðið um umsókn að ESB. En aðildarsinnar geta enn gert smá yfirbót synda sinna í þágu lýðræðis, það er að leifa þjóðinni að kjósa núna um áframhald viðræðna við ESB, nýtt ESB.

En lýðræðisást aðildarsinna er ekki eins og slík ást er hjá flestum. Þeirra lýðræðisást er á ESB lýðræðið, en eins og allir vita er það nokkuð sérstakt og ekki eins og flestir telja að lýðræðið ætti að vera. Miðstýring og boðvald einkennir einkum það lýðræði og ef nauðsyn ber til að kjósa, er beitt öllum ráðum til að "rétt" niðurstaða fáist og ef það ekki tekst er bara kosið aftur og aftur, þar til látið er undan.

Þetta er það lýðræði sem aðildarsinnar hylla og því vilja þeir ekki kjósa fyrr enn búið er að undirbúa jarðveginn sem best, með þeim meðulum sem ESB býður upp á.

 

Meirihluti vill ljúka ESB-viðræðum