Hvað er það sem gengur svo vel ?

Stebbi og Jóka eru ánægð með gang aðildarviðræðna. Hvað eru þau ánægð með í því sambandi? Varla að gangurinn sé hraður!

Í júní voru fyrstu fjórir kaflarnir opnaðir, búið er að loka tveim þeirra aftur. Í gær voru svo tveir aðrir opnaðir og þeim loka strax aftur. Allir þessir sex kaflar eru um málefni sem enga eða mjög litla umræðu þurfa, þetta eru kaflar um málefni sem við höfum þegar aðlagað okkar regluverk að ESB, gegnum EES samninginn.

Kaflarnir eru 35 talsins. Ef það tekur fimm mánuði að afgreiða fjóra kafla sem enga umræðu þurfa, hvað tekur þá langan tíma að ræða þá kafla sem ágreiningur er um.

Það hefur verið gefið út að stefnt skuli að því að allir kaflar verði opnaðir fyrir mitt næsta ár. Sú ákvörðun er alfarið í höndum samninganefndar ESB, sú íslenska verður bara að hlíða. En þetta segir ekkert um gang viðræðna, það er hversu fljótt gengur að loka köflunum sem gildir.

Mér dettur alltaf í hug sú fullyrðing sem Eiríkur Bergmann, er titlar sig "evrópufræðing", um að einungis tæki þrjá mánuð að loka samning við ESB. Það væru svo margir kaflar sem enga umræðu þyrftu og ekki tæki nema þrjá mánuð að ræða og komast að niðurstöðu um hina kaflana. Hann fullyrti reyndar við sama tækifæri að mánuði eftir þetta gætum við tekið upp evruna!!

Það er ljóst að þessi "evrópufræðingur" vissi lítið hvað hann var að bulla, þar sem staðreyndir segja að það taki meir en mánuð að ganga frá hverjum þeim kafla sem enginn ágreiningur er um. Reyndar kemur aldrei annað en bull frá þessum "fræðingi", hvort sem hann tjáir sig um Evrópu, forsetann okkar eða bara hvað annað sem hann er spurður út í.

Það er samninganefnd ESB sem stjórnar hraða viðræðna. Það getur verið að þessi hægagangur viðræðnanna sé vísvitandi af þeirra hálfu, að þeir átti sig á að vilji Íslendinga fyrir aðild er alls ekki fyrir hendi og því sé málið dregið á langinn til að forðast að taka á deilumálum. Að þetta sé gert til að ekki sé búið að mynda enhverjar deilur milli Íslands og ESB þegar umsóknin verður dregin til baka, en það mun óneitanlega gerast eftir næstu kosningar, sem verða vonandi sem fyrst.

Einnig er hugsanlegt að samninganefnd ESB sé að bíða eftir að áróðurskrifstofa þeirra, sem á að koma í Reykjavík, taki til starfa. Að þeir telji nauðsynlegt að starfræksla hennar sé komin á fullt áður en farið er á fulla ferð í viðræðum.

Það er þó ljóst að áróður, hversu miklum fjármunum ESB ætlar að spreða til hans, mun ekki duga til að kaupa sjálfstæðið af Íslendingum!!

 

Lýsa ánægju með viðræðuferlið