Er það það sem okkur vantar í dag ?

Miðað við það verð sem Huang vill greiða mun jarðaverð hækka. Það sem hann býður, um 45.000 kr/ha, er í hærri kantinum á því gangverði sem var á jörðum rétt fyrir hrun. Þá er reyndar miðað við vel byggðar jarðir í ábúð og áhöfn og vélar inn í dæminu. Hoang er einungis að kaupa víðerni.

En er þetta sem vanta í dag? Jarðaverð hækkaði mikið á fyrsta áratug þessarar aldar, allt fram að hruni. Undir lok síðustu aldar miðaðist verð bújarða við getu búa til að borga niður kostnað við kaup þeirra. Síðustu ár fyrir hrun hafði jarðaverð meir en tífaldast, sumar jafnvel tuttugufaldast, án þess að tekjur búana hefði hækkað sem nokkru nemur. Því var jarðaverð komið langt umfram getu búanna sjálfra. Þessi hækkun kom einkum til vegna söfnunar nokkurra einstaklinga á jörðum, enginn taldist maður með mönnum nema eiga eina þotu og tuttugu til þrjátíu jarðir. Eftir hrun hefur jarðaverð hugsanlega lækkað eitthvað, en það er þó langt frá því sem búin sjálf bera.

Þetta hefur leitt til þess endurnýjun í landbúnaði er nánast stopp. Það er vonlaust dæmi að kaupa sér jörð til ábúðar. Jafnvel geta afkomendur ekki tekið við af feðrum sínum lengur, því eins og efnahags og viðskiptaráðherra ætti að vita, verða feðurnir að selja sonunum jarðirnar, a.m.k.á pappír. Skattayfirvöld taka ekki til greina neitt verð undir gangverði, svo jafnvel þó faðirinn vilji gefa syni sínum jörðina, verður hann eftir sem áður að skila skatti að gangverði slíkrar jarðar. Jafnvel sá skattur einn er langt fyrir ofan getu búsins.

Því er síst þörf á að hækka verð bújarða í landinu.

Hitt er svo annað mál að ríkið hefur setið fast við sinn keyp þegar kemur að bótum fyrir land sem tekið er undir vegi, virkjanir eða annað. Þær bætur fylgdu ekki þeirri þróun sem hér varð á jarðaverði í upphafi aldarinnar. Ríkið notast við eiginn gjaldskrá og er hún langt frá raunveruleikanum, var orðin það löngu áður en jarðaverð tók kipp upp á við.

Það er því vandséð að þessi kaup Huangs hafi nokkur áhrif þar. Ef almennt jarðaverð margfaldast án hækkunar gjaldskrár ríkisins, hvers vegna ætti þá ein jarðasala, sem í raun er lítið hærra en almennt jarðaverð hefur náð, að gera það?

Hvort Huang fái að kaupa þessa jörð og fara í framkvæmdir þar, tek ég ekki afstöðu til.

Við þurfum hins vegar enga útlendinga til að segja okkur hvers virði jarðir landsins séu, eins og Árni Páll heldur fram.

Verð bújarða á að miðast við getu búanna til að greiða þann stofkosnað niður, annað gengur ekki upp til lengdar. Hins vegar voru það fjárglæframenn sem skekktu þetta verð verulega, á velmerktarárum þeirra hér á landi. Það gerðu þeir af einskærri græðgi.

Huang Nobu staðfestir einungis verk þessara glæpamanna og ráðherra tekur undir!!

Árni Páll: Mun hækka verð á jörðum